Më 17 nëntor, 628.630 kosovarë votuan për përbërjen e re të Kuvendit

Në zgjedhjet e përgjithshme të 17 nëntorit, të drejtën e tyre të votës e kanë shfrytëzuar gjithsej 628.630 votues, apo 40.10 përqind e qytetarëve me të drejtë vote, të cilët jetojnë brenda Kosovës por edhe jashtë saj.

42.80 përqind e votuesve që jetojnë në Kosovë, ndërkaq llogaritet se kanë ushtruar të drejtën e tyre ligjore për të votuar, por përqindja është ulur në 40.10 për shkak të mospjesëmarrjes në votime të shumë kosovarëve që jetojnë jashtë Kosovës apo edhe për shkak të shpalljes të pavlefshme të shumë fletëvotime që kanë ardhur nga jashtë Kosovës, përmes postës.

Fletëvotime përmes postës janë 6.233 mijë, fletëvotime me kusht janë 33.791 mijë apo 5.43 për qind, kurse fletëvotime të pavlefshme janë 34.833 mijë.

Gjithsej vota sipas partive janë; PDK me 196.207; LDK 129.410; AKR me 70.165 vota; LDD-PSHDK ka fituar 57.002 vota; AAK me 54.611 vota’ ORA ka fituar 23.722 vota PD ka fituar 9 890 vota, ndrysa partitë e tjera kanë fituar së bashku 30.760 vota.

Ndërkohë, Partia Demokratike e Kosovës (PDK), fituese në këto zgjedhje, do të ketë 37 deputetë në Kuvendin e Kosovës, Lidhja Demokratike e Kosovës (LDK), do të ketë 25 deputetë, kurse Aleanca Kosova e Re (AKR) 13 deputetë, Lidhja Demokratike e Dardanisë (LDD), do të ketë 11 deputetë dhe Aleanca për Ardhmërinë e Kosovës (AAK) do të ketë 10 deputetë në Kuvendin e Kosovës.

Ndërsa, partitë e komuniteteve, të cilat do të kenë ulëse në Kuvendin e Kosovës janë; KDTP, SLS, PDAK, SDKIM dhe VAKAT me nga 3 deputetë, SDA, SNS do të kenë nga 2 deputetë, ndërsa ND, GIG, SKMS, SNSDKIM dhe PREBK nga një deputet. /l.krasniqi/

Rezultatet: PDK 37 deputetë, LDK 25, AKR 13, LDD 11 dhe AAK 10

Me 34.3% të votave, Partia Demokratike e Kosovës (PDK) do të jetë forca kryesore parlamentare në vend me 37 deputetë, e pasuar nga Lidhja Demokratike e Kosovës (LDK), e cila ka fituar 22.6% të votave dhe do të ketë 25 deputetë, kurse partia e tretë do të jetë Aleanca Kosova e Re (AKR) me 12.3% dhe 13 deputetë, Lidhja Demokratike e Dardanisë (LDD), e cila ka fituar 10.1% të votave do të ketë 11 deputetë dhe Aleanca për Ardhmërinë e Kosovës (AAK) që ka fituar 9.6% të votave do të ketë 10 deputetë në Kuvendin e Kosovës.

Këto janë rezultatet përfundimtare të zgjedhjeve të përgjithshme, që u zhvilluan më 17 nëntor, të cilat u shpallën të hënën nga Komisioni Qendror i Zgjedhjeve.

Ndërkaq, partitë politike kanë 48 orë afat për ankesa ndaj këtyre rezultateve dhe nëse nuk ka ndonjë ankesë, rezultatet nënshkruhen nga shefi i UNMIK-ut, Joachim Ruecker.

Sipas rezultateve përfundimtare, jashtë parlamentit kanë mbetur Partia Reformiste ORA, Partia e Drejtësisë, Lëvizja Kombëtare për Çlirimin e Kosovës.

Kurse, partitë politike që përfaqësojnë komunitetet pakicë do t’i kenë 24 ulëse në Kuvendin e ri të Kosovës.

Prej tyre, partitë politike të serbëve do t’i kenë gjithsej 10 ulëse, aq sa i kanë të rezervuara me Kornizë Kushtetuese, kurse pakicat tjera do t’i kenë 14 ulëse, meqë disa nga partitë e tyre kanë fituar ulëse shtesë nga ato që i kishin të rezervuara.

Kuvendi i ri i Kosovës, ndërkaq do t’i ketë 96 deputetë shqiptarë, prej të cilëve 30 për qind duhet të jenë femra.

Shefi i UNMIK-ut, tani duhet t’i nënshkruajë rezultatet, për t’i hapur rrugë bisedimeve për krijimin e koalicionit të ri qeverisës në Kosovë. /l.krasniqi/

Ruecker certifikoi rezultatet e zgjedhjeve dhe tha se preferon koalicion të gjerë

Shefi i UNMIK-ut, Joachim Ruecker, ka certifikuar të mërkurën rezultatet e zgjedhjeve të 17 nëntorit për Kuvendin e Kosovës, ndërkohë që ua ka vazhduar edhe për 6 muaj mandatin kryetarëve dhe anëtarëve të asambleve në komunat veriore, Zveçan, Leposaviq dhe Zubin Potok.

Në një konferencë për media, kryeadministratori Ruecker, ndër të tjera tha se ai preferon që Kosova ta ketë një koalicion të gjerë dhe të qëndrueshëm.

“Unë e inkurajoj një koalicion qeverisës të gjerë dhe të qëndrueshëm. Unë jam inkurajues i koalicionit të gjerë”, tha kryeadministratori Ruecker.

Ruecker, i cili ka certifikuar zgjedhjet për Kuvendin e Kosovës, ka marrë vendim edhe për komunat në të cilat shumicën e përbëjnë serbët e ku pjesëmarrja në votimet e 17 nëntorit ka qenë tejet ulët.

Sipas vendimit të tij, iu vazhdohet për 6 muaj mandati kryetarëve dhe anëtarëve të asambleve komunale në komunat veriore, Zveçan, Leposaviq dhe Zubin Potok dhe po ashtu edhe në komunën e Shtërpcës i vazhdohet edhe për 6 muaj mandati kryetarit serb.

Ruecker ndër të tjera ka vendosur që edhe në komunën e Shtërpcës t’i vazhdohet edhe për 6 muaj mandati kryetarit serb, ndërsa në Kuvendin Komunal do të përfaqësohen edhe partitë shqiptare.

Ndërkohë për komunën e Artanës, (ish Novobërdës), ai ka vendosur që kandidati shqiptar që ka fituar në zgjedhje të jetë kryetar komune, ndërsa shumicën në Kuvendin Komunal ta kenë serbët.

Të gjitha këto vendime, Ruecker tha se i ka marr pas daljes së ulët të serbëve në zgjedhje dhe siç tha ai, për të pasur një përfaqësim të drejtë të serbëve nëpër komuna.

“Unë i inkurajoj të gjitha palët që të punojnë në mënyrë konstruktive për të zbatuar këto vendime, përfaqësuesit komunal të UNMIK-ut do të monitorojnë për së afërmi implementimin e vendimit ”, tha Ruecker.

Sipas shefit të UNMIK-ut, vendimet që ai ka marrë e kanë bazën në rezolutën 1244 dhe është bërë me qëllim të përfaqësimit të drejtë pakicave në institucione. /sh.mustafa/

"Demokracia në veprim": PDK fituese, e pasuar nga LDK

Partia Demokratike e Kosovës vazhdon të prijë me vota pas numërimit të rezultateve të deritashme në zgjedhjet 2007 në Kosovë, sipas koalicionit të organizatave joqeveritare “Demokracia në veprim”.

Pas numërimit të mbi 80 për qind të votave, renditja në zgjedhjet e sivjetme është si vijon: Partia Demokratike e Kosovës- 34 %, Lidhja Demokratike e Kosovës- 22 %, Aleanca Kosova e Re- 12, koalicioni Lidhja Demokratike e Dardanisë- Partia Shqiptare Demokristiane– 10%, Aleanca për Ardhmërinë e Kosovës– 9% dhe Partia Reformiste ORA- 4 për qind.

Këto të dhëna rezultojnë nga numërimi i votave në 1.893 prej gjithsej 2323 vendvotimeve anembanë Kosovës.

Pack: Performansa e dobët e institucioneve ka ndikuar në mosdalje në zgjedhje

Deputetja e Parlamentit Evropian, Doris Pack tha të dielën në Prishtinë se më shumë se nga moti i ftohtë, votuesit kosovarë kanë protestuar duke mos dalë në zgjedhjet e djeshme për shkak të ngathtësisë së institucioneve vendore për t'u zgjidhur atyre problemet dhe për shkak të shkallës së lartë të korrupsionit në Kosovë.

Pack deklaroi kështu gjatë një konference për gazetarë të Këshillit të Evropës në Prishtinë, i cili ka marrë pjesë me 150 vëzhgues gjatë votimeve në tërë Kosovën, për të dhënë notë pozitive për mbarëvajten e zgjedhjeve.

Duke iu referuar shifrave preliminare sipas të cilave pjesëmarrja e kosovarëve në zgjedhje nuk është më e lartë se 45 për qind, dhe deklaratave se moti i ligë ishte fajtori kryesor për pjesëmarrje të vogël, Pack tha se votuesit kanë hezituar të dalin në votime për shkak të mospunës së mjaftueshme të institucioneve kosovare për një jetë më të mirë për ata.

“Duhet ta mbajmë mend se secili në rajon flet për korrupsionin brenda klasës politike. Mendoj se kjo duhet të ndërpritet dhe të mos tolerohet më tej nga njerëzit që janë zgjedhur dje", tha Pack.

Eurodeputetja Pack ka sfiduar arsyetimin e zyrtarëve të UNMIK-ut dhe OSBE-së që i kanë lënë fajin motit të lig gjatë të shtunës për pjesëmarrjen e ulët në zgjedhje.

"Kemi parë këtë pjesëmarrje të ulët dhe duhet ta pyesim veten pse kjo pjesëmarrje. Kemi ardhur në konkluzion se kjo pjesëmarrje e ulët reflekton performansën e keqe të përfaqësuesve të zgjedhur", tha Pack.

Ajo nuk ka lënë pa kritikuar as Beogradin dhe liderët ekstremistë të serbëve të Kosovës të cilët, sipas saj, kanë shkelur Rezolutën 1244 të Këshillit të Sigurimit.

Ajo tha se kërcënimet për mosdalje në zgjedhje të serbëve lokal erdhën nga Beogradi, por erdhën edhe nga vetë liderët e serbëve të Kosovës. “Pra unë mendoj se fajtori gjendet atje. Në anën tjetër, unë kam parë disa qendra votimi në gjendje të mjerë. Nuk është vetëm OSBE fajtore për këtë, janë edhe liderët serbë të cilët nuk deshën t'i lënë shkollat të përdoren si qendra votimi”, tha Pack.

Doris Pack duke kryesuar Komisionin për Ballkanin në parlamentin Evropian është bërë njëri ndër zërat më të njohur të Kosovës dhe rajonit në Bruksel për proceset politike këtu. /shaip mustafa/

KE: Zgjedhje demokratike, në përputhshmëri me standardet ndërkombëtare

Misioni i Këshillit të Evropës për Vëzhgimin e Zgjedhjeve në Kosovë, zgjedhjet e 17 nëntorit i ka vlerësuar si demokratike dhe në përputhshmëri me standardet evropiane dhe ndërkombëtare.

Sidoqoftë, ishte konkludim i përbashkët i krerëve të këtij misioni se Kosova duhet të punojë akoma në përmirësimin e raporteve ndërmjet komuniteteve të ndryshme që jetojnë në vend.

Giovanni DiStassi, shefi i Misionit të Këshillit të Evropës për Vëzhgimin e Zgjedhjeve në Kosovë, në një konferenë për gazetarë, të dielen, vlerësoi se zgjedhjet ishin në kuadër të standardeve evropiane, ndërkohë që sipas tij pjesëmarrja ishte shumë e ulët.

"Janë tri gjëra të cilat duhet thënë. E para, zgjedhjet janë mbajtur në përputhje me standardet evropiane dhe ndërkombëtare dhe rezultati duhet respektuar. E dyta është se pjesëmarrja në këto zgjehdje ishte shumë e ulët. Dhe e treta është se në Kosovë vazhdon të ekzistojë një mur i theksuar ndarës ndërmjet shqiptarëve dhe serbëve", tha DiStassi.

Ndërsa, Ludmila Sfirloaga nga Kongresi Evropian tha se zgjedhjet kanë përmbushur standardet e demokracisë e sidomos sjellja e partive poltike si gjatë fushatës asshtu edhe gjatë votrmit.

“Zgjedhjet dhe procesi elektoral janë zhvilluar sipas standardeve demokratike evropiane dhe ndërkombëtare duke përfshirë këtu edhe sjelljen e partive politike. Këtyre zgjedhjeve u ka paraprirë një fushatë e qetë dhe e lirë elektorale duke përjashtuar kërcënime dhe fyerje të rënda", tha Sfirloaga.

Që nga 1 tetori Misioni i Këshillit të Evropës për Vëzhgimin e Zgjedhjeve në Kosovë ka vëzhguar procesin zgjedhor i cili përfundoi më 17 nëntor. Në ditën e zgjedhjeve misioni ka sistemuar më shumë se 150 vëzhgues nëpër Kosovë. /sh.mustafa/

Sejdiu pranon humbjen, uroi PDK-në dhe tha se do të mbetet kryetar i vendit

Kryetari i Kosovës dhe ai i Lidhjes Demokratike të Kosovës (LDK), Fatmir Sejdiu, pranoi të hënën humbjen e partisë së tij në zgjedhjet e 17 nëntorit duke i uruar Partisë Demokratike të Kosovës (PDK) fitoren dhe njëkohësisht kërkoi që sa më shpejtë të formohet qeveria e re e vendit.

Sejdiu në një konferencë për media që mbajti në godinën e Presidencës, zgjedhjet e 17 nëntorit i vlerësoi lart, për faktin se qytetarët e Kosovës kanë treguar një kulturë të lartë politike dhe demokratike, duke zhvilluar një proces normal zgjedhor, veçanërisht në këtë periudhë shumë të ndjeshme për vendin.

Ai, po ashtu, falënderoi edhe partitë politike, iniciativat qytetare dhe kandidatët e pavarur për fushatën shumë të mirë elektorale që kanë zhvilluar. Megjithatë, kryetari i Kosovës shfaqi një dozë zhgënjimi që në këtë proces nuk është parë një numër edhe më i madh i votuesve në zgjedhje.

“Megjithatë, duhet të shpreh keqardhjen time për përqindjen e ulët të pjesëmarrjes së qytetarëve të Kosovës në këto zgjedhje, edhe pse kjo nuk e zbeh shkallën e lartë të kulturës demokratike të demonstruar”, u shpreh mes tjerash Sejdiu.

Ai ndërkaq, la të kuptohet se pavarësisht humbjes së LDK-së në zgjedhje, do të mbetet edhe më tej kryetar i Kosovës. Këtë, sipas tij, ia garanton Korniza Kushtetuese. Sejdiu, ndryshe është emëruar kryetar i Kosovës menjëherë pas vdekjes së ish-kryetarit Ibrahim Rugova, në fillim të vitit 2006 dhe sipas kushtetutës ai mund të ushtrojë këtë detyrë deri në vitin 2009.

Sipas kryetarit të Kosovës, në këtë përbërje do të funksionojë edhe Ekipi i Unitetit, të paktën derisa të përfundojë procesi i bisedimeve shtesë. “Kanë mbetur edhe dy takime dhe është me rëndësi që këto të përfundojnë suksesshëm dhe unë çmojë punën e secilit anëtar të Ekipit të Unitetit në mënyrë më të mirë të mundshme që është bërë”, tha Sejdiu.

Edhe pse rezultatet zyrtare të zgjedhjeve akoma nuk janë dhënë, Sejdiu e uroi partinë rivale, PDK-në për fitoren, ndërsa kërkoi që sa më parë të krijohet qeveria e re e vendit, e cila, sipas tij, në rend të parë duhet të ketë interesin e qytetarëve të Kosovës.

“Me komunikimin zyrtar të rezultateve, do të përgëzojë fituesin dhe do të bëj ftesë që menjëherë të fillojnë bisedimet-konsultimet për konstituimin e shpejtë të Qeverisë së Kosovës”, tha Sejdiu, duke besuar që edhe partia e tij- LDK do të jetë një parti e rëndësishme në procesin vijues të Kosovës.

Ai fillimisht u rezervua të japë komente nëse do të pranojë koalicionin me PDK-në, por tha se partia e tij mbetet e hapur. Është e rëndësishme që LDK-ja, sipas Sejdiut, të kuptojë proceset dhe si e tillë nuk do të jetë anash, mirëpo do të jetë pjesë e proceseve demokratike.

“LDK-ja është e gatshme që të jetë kontribuuese maksimale në të gjitha procese demokratike të Kosovës. Kontributi mund të jetë në rolin që një parti politike mund të ketë në parlament”, tha Sejdiu duke kundërshtuar, ndërkaq thirrjen e nënkryetarit të LDK-së, Eqrem Kryeziu për dorëheqje nga posti i presidentit.

Ndryshe, nënkryetari i parë i kësaj partie, Kryeziu sot ka dhënë dorëheqje nga kreu i LDK-së, për faktin se kjo parti nuk arriti të fitojë rreth 40 për qind të votave. Kryeziu gjatë një deklarate për media, para mbajtjes së zgjedhjeve, ka pohuar se në rast se LDK nuk do t'i fitonte 40 % të votave do ta këshillonte edhe Sejdiun, që krahas tij të jepte dorëheqje.

“Ne mendojmë të vazhdojmë e të punojmë. Z. Kryeziu mund të ketë paraqit ndonjë ide, por ato nuk janë ide të Kryesisë së LDK-së. Megjithatë Kryeziu është ndër hallkat kryesore të punës sonë”, u shpreh Sejdiu.

Sejdiu, po ashtu, kundërshtoi pohimet se LDK në këto zgjedhje ka pësuar debakël, ngaqë sipas tij, ka edhe parti të tjera që janë rreshtuar edhe më keq, madje edhe që s’e kanë kaluar fare pragun zgjedhor. /milaim shefkiu/

Ekipi i Unitetit thotë se s’ka status neutral për Kosovën

Anëtarët e Ekipit të Unitetit deklaruan të hënën se nuk do të ketë status neutral për Kosovën, ndërkohë sipas tyre Kuvendi i ri i Kosovës që do të konstituohet shumë shpejtë do të marrë vendimin për statusin që do të koordinohet edhe me miqtë ndërkombëtarë.

Këto deklarata u dhanë në Aeroportin e Prishtinës, para nisjes së anëtarëve të Ekipit të Unitetit, në takimin e Brukselit ndërmjet palës kosovare dhe asaj serbe me ndërmjetësim të Treshës ndërkombëtare.

Kryetari i Kosovës, Fatmir Sejdiu dekalroi se nëse do të ketë ndonjë bllokadë për statusin e Kosovës të gjithë duhet ta dijnë se vendi nuk është i gatshëm për një gjë të tillë.

“Po që se do të ketë prapë një ndjonjë të bllokimit të procesit në çfarëdo forme, ne nuk jemi të gatshëm të jemi peng i askujt. Prandaj, Kuvendi i Kosovës, që do të konstituohet shumë shpejtë, do të marrë vendimin e vet që do të koordinohet me miqtë e Kosovës, që janë në përkushtim të veçantë për të ardhmën tonë si shtet i pavarur dhe për ecjen tonë të sigurtë në integrimet euroatlantike”, tha Sejdiu.

Ndërsa, kryeministri i Kosovës Agim Çeku tha se për Kosovën nuk mund të ketë status neutral, pasi kjo zgjidhje është sikur të mos kesh fare status.

“Ne jemi duke kërkuar status të qartë dhe statusi është pavarësia e vendit tonë. Takimi i fundit përfundon më 28 nëntor dhe më 10 dhjetor Ekipi i Unitetit e ka kryer detyrën e vet. Do t’i kemi institucionet e legjitimuara me votën e lirë të qytetarëve dhe ato do ta marrin përgjegjësinë për udhëheqjen e vendit”, tha Çeku, sipas të cilit pas datës 10 dhjetor Kosva nuk ka nevojë për Ekip të Unitetit.

Edhe kryetari i Partisë Demokratike të Kosovës Hashim Thaçi, deklaroi se nuk ka neutralitet për statusin e Kosovës. “Gjithçka do të ndodh në koordinim me SHBA dhe BE. Për Kosovën është vetëm një zgjidhje, pavarësia e Kosovës. Nuk ka neutralitet për statusin në mes Kosovës dhe Serbisë”, tha Thaçi.

Ndryshe, ai tha se edhe në të ardhmen do të kultivojë unitetin shtetformues në kuadër të spektrit politik kosovar dhe se ai do jetë garantues i unitetit institucional dhe qytetar të Kosovës.

Veton Surroi, kryetar i Partisë ORA para nisjes për në Bruksel tha se pa marrë parasysh se çfarë qëndrimi do të paraqitet nga ana e Beogradit, kosovarët do të përpiqen të trregojnë se ekziston një ardhmëri e marrëdhënieve të mira në mes dy shteteve.

“Nëse jo tash, pas 5 vjetësh, nëse jo pas 5 vjetësh, pas 15 vjetësh. Por, Beogradi historikisht duhet të pajtohet me faktin se Kosova po bëhet e pavarur dhe se e do vendin e vet në Europë”, tha Surroi.

Takimi i Brukselit është i gjashti me radhë në vazhdën 120 ditëshe të bisedimeve të nisura dhe të udhëhequra nga Treshja ndërkombëtare. /shaip mustafa/

SHPK e mobilizuar për të ofruar siguri në ditën e zgjedhjeve

Shërbimi Policor i Kosovës (SHPK), me 17 nëntor (nesër), do të jetë i mobilizuar për të ofruar siguri gjatë mbajtjes së zgjedhjeve dhe sipas zyrtarëve të këtij shërbimi, gjendja pritet të jetë e qetë.

Zëdhënësi i SHPK-së, Veton Elshani, tha për KosovaLive se më 17 nëntor, e gjithë policia do të jetë e mobilizuar. “Do të kalojmë në orar 12 orësh, me dy ndërrime dhe të gjithë policët do të jenë në detyrë, pavarësisht nëse kanë apo jo pushim”, tha ai.

Elshani, njoftoi se SHPK ka bashkëpunim edhe me policinë e UNMIK-ut, mirëpo sipas tij, kryesisht do të jenë pjesëtarët e SHPK-së ata të cilët do ta bëjnë sigurimin e vendvotimeve me një prezencë minimale të policisë së UNMIK-ut.

Ai më tej tha se janë të gatshëm për çdo ndërhyrje, megjithëse mohoi mundësinë që të ketë nevojë për ndërhyrje, pasi shprehu besimin se situata do të jetë e qetë, sikurse edhe gjatë 21 ditëve të fushatës parazgjedhore.

Elshani tha gjithashtu që gjendja e përgjithshme gjatë fushatës parazgjedhore ka qenë e qetë dhe nuk ka pasur raste të prishjes së rendit dhe qetësisë publike.

“Kemi pasur raste kërcënimi, por ajo është pjesë e hetimeve, shembull në një rast janë kërcënuar serbet e Graçanicës, por mendoj që në këtë fushatë kemi pasur ngritje të vetëdijes së qytetarëve”, theksoi ai.

Elshani ndër të tjetra njoftoi se SHPK e ka pasur një grup të posaçëm në kuadër të komandës kryesore të policisë në Prishtinë, i cili ka pasur takime të rregullta me Komisionin Qendror të Zgjedhjeve (KQZ), dhe me OSBE-në.

Ky grup i posaçëm, siç tha ai, është formuar para fillimit të fushatës elektorale.

Ndërsa, sa i përket sigurisë në ditën e zgjedhjeve, gjithashtu edhe shefi i misionit të OSBE-së, Tim Guildmann, ka thënë se janë duke bashkëpunuar ngushtë me SHPK-në, policinë e UNMK-ut dhe KFOR-in, në mënyrë që këto zgjedhje të jenë të qeta dhe paqësore.

Ndryshe, KQZ kësaj here ka shtuar për 35 për qind numrin e vendvotimeve.

Në këto zgjedhje, sipas KQZ-së, do të jenë në dispozicion 621 qendra të votimit me mbi 2 mijë vendvotime, ndërsa të drejtë vote kanë rreth 1.5 milionë qytetarë.

KQZ-ja ndërkaq ka hapur gjithsej 58 qendra të votimit dhe mbi 600 vendvotime të reja, ndërsa në një qendër votimi, maksimalisht parashihet të votojnë 720 veta, duke e zvogëluar numrin prej 1.200 sa ka qenë në zgjedhjet e kaluar. /f.loshi/

Sonte i jepet fund fushatës 21 ditëshe zgjedhore në Kosovë

Pas 21 ditëve fushatë parazgjedhore, partitë politike, iniciativat qytetare dhe kandidatët e pavarur, garues në zgjedhjet 17 nëntorit, të enjten (sonte) në ora 24:00 të mesnatës, do t’i japin fund fushatës së tyre elektorale.

Ndërkaq të gjithë ata kandidat që mbajnë tubime zgjedhore pas kësaj kohe, shkelin rregullat e Komisionit Qendror të Zgjedhjeve (KQZ), dhe rastet e tyre do të trajtohen nga Komisioni për ankesa dhe apele.

Sipas rregullores së KQZ-zë, gjatë periudhës 24 orëshe para hapjes së vendvotimeve për zhvillimin e votimeve e deri në mbyllje të tyre, subjekteve politike dhe përfaqësuesve të tyre u ndalohet kryerja e çfarëdolloj aktiviteti që lidhet me fushatën e zgjedhjeve.

U ndalohet mbajtja e takimeve për qëllime të fushatës së zgjedhjeve, shfrytëzimi i megafonave ose i sistemeve të tjera për t’iu drejtuar publikut kudo qoftë në Kosovë me qëllim të ndikimit në votues, ose organizimi i çfarëdo manifestimi, procesioni ose demonstrate të natyrës politike ose pjesëmarrja në të.

Pastaj ndalohet shitja, furnizimi, blerja, shërbimi ose konsumimi i pijeve alkoolike më afër se 100 metra nga cilado qendër e votimit në ditën e zgjedhjeve, shfrytëzimi i mediave lokale ose ndërkombëtare me qëllim të ndikimit në votues, zhvillimi i çfarëdolloj fushate të zgjedhjeve në objektet e qendrës së votimit, mbajtja e kartelave të zgjedhjeve, distinktivëve ose e shenjave të tjera të zgjedhjeve nga anëtarët e këshillit të vendvotimit, vëzhguesit e akredituar ose votuesit në ditën e zgjedhjeve.

Gjithashtu, gjatë këtyre 24 orëve, ndalohen rezultatet e anketave të hulumtimit të opinionit publik ose analizat në lidhje me qëllimet e votimit të zgjedhësve në zgjedhje, nuk duhet të publikohen ose t’i kumtohen publikut gjatë kësaj periudhe, duke filluar pesë ditë para hapjes së vendvotimeve dhe duke përfunduar me mbylljen e votimeve.

Ndërkaq, shumë parti politika si Lidhja Demokratike e Kosovës (LDK), Partia Demokratike e Kosovës (PDK), Partia Reformiste ORA, Partia e Drejtësisë (PD) dhe disa subjekte tjera, fushatën e tyre elektorale do ta përmbyllin në Prishtinë. Të tjerat, ndërkaq në qytete të ndryshme të Kosovës.

Zgjedhësit kosovarë, ndërkaq pritet të kenë përpara vetes më 17 nëntor 97 oferta për votim në nivelin lokal dhe qendror të qeverisjes, për mandatin e ardhshëm të institucioneve të Kosovës, ndërkohë që përveç entiteteve politike shqiptare, në garë do të jenë edhe përfaqësuesit e pakicave, përfshirë këtu edhe serbët.

Ndërsa me një vendim të Ministrisë së Arsimit, Shkencës dhe Teknologjisë, të gjitha shkollat fillore, të mesme dhe disa fakultete kanë filluar të përgatiten për të shërbyer si qendra votimi për ditën e zgjedhjeve.

Ndryshe, procedura për të votuar në zgjedhjet e sivjetme parlamentare dhe lokale është më e komplikuar se herëve të tjera dhe sipas përfaqësuesve të Misionit në Kosovë të Organizatës për Siguri dhe Bashkëpunim në Evropë (OSBE), procedura e votimit kërkon nga 8 deri 9 minuta kohë.

Drejtori i Departamentit të zgjedhjeve në OSBE, Hugh Fulton, ka thënë se për të qenë koha e mjaftueshme dhe për t’u përmbyllur procesi i zgjedhjeve me sukses, KQZ kësaj here ka shtuar për 35 për qind numrin e vendvotimeve.

Në këto zgjedhje, sipas KQZ-së, do të jenë në dispozicion 621 qendra të votimit me mbi 2 mijë vendvotime, ndërsa të drejtë vote kanë rreth 1.5 milionë qytetarë.

KQZ-ja ka hapur gjithsej 58 qendra të votimit dhe mbi 600 vendvotime të reja, ndërsa në një qendër votimi, maksimalisht parashihet të votojnë 720 veta, duke e zvogëluar numrin prej 1.200 sa ka qenë në zgjedhjet e kaluar.

Ndërkaq, për vëzhgimin e zgjedhjeve në Kosovë, para disa ditëve në vend kanë arritur edhe 150 vëzhgues afatshkurtër, të dërguar nga 34 shtete evropiane. Ata pas një trajnimi dy ditor që e kanë mbajtur në Prishtinë, janë sistemohen në grupe nga dy nëpër vende të ndryshme të Kosovës që të vëzhgohen zgjedhjet e 17 nëntorit.

Sipas Misionit të Këshillit të Evropës (KE) ditën e zgjedhjeve, 150 vëzhguesit do të duhet t’i plotësojnë formularët e vëzhgimit që i mbulojnë indikatorët kryesorë, siç janë hapja dhe mbyllja e vendvotimeve si dhe procedurat e përgjithshme të votimit dhe numërimit të votave.

Pastaj, këto informata do të përmblidhen dhe procedohen nëpërmjet internetit nga një grup ekspertësh statistikor.

Ndërsa, ditën e zgjedhjeve, secili grup vëzhguesish mesatarisht do të vizitojë tetë vendvotime, apo 75 grupet vëzhguese, duhet të arrijnë të vëzhgojnë një të katërtën e numrit total të vendvotimeve.

Shifrat e përmbledhura, ndërkaq do të jenë shtylla e deklaratës preliminare e cila është paraparë t’i paraqitet mediave ditën e nesërme pas zgjedhjeve. Gjithashtu, bëhet e ditur se në këtë konferencë do të vlerësohet nëse procesi zgjedhor ishte në përputhje me standardet ndërkombëtare.

{ër vëzhgimin e zgjedhjeve Instituti Kosovar për Kërkime dhe Zhvillime të Politikave (KIPRED), në bashkëpunim me 10 organizata joqeveritare kanë themeluar koalicionin “Demokracia në Veprim”, të cilët kanë filluar punën e mbikëqyrjes së fushatës së partive politike 21 ditë më parë.

Koalicionin “Demokracia në Veprim”, në ditën e votimeve, me 17 nëntor, do t’i ketë 2.300 monitorues në terren.

Kjo, ndërkaq është hera e pestë pas përfundimit të luftës (1998-1999) që Kosova mban zgjedhje të lira dhe demokratike. Mirëpo, është hera e parë që në këto zgjedhje aplikohet pragu prej 5 për qind, që është kusht për të hyrë në parlament. /flora loshi/

BIK kërkon nga deputetët e ardhshëm shpalljen e pavarësisë së vendit

Drejtues të Bashkësisë Islame të Kosovës (BIK), të enjten porositën të gjithë deputetët që do të ulen në Parlamentin e Kosovës, që të mos vonohen në shpalljen e pavarësisë së vendit, mirëpo duke pasur parasysh konsultimin e ngushtë me miqtë ndërkombëtarë.

Këtë porosi ata e bënë në një konferencë për media në Prishtinë, ku ishin të bindur se qytetarët do të votojnë për ato parti që ofruan programe të studiuara mirë, për ata liderë që nuk janë të korruptuar dhe që pranojnë të sakrifikohen për të mirën e popullit të Kosovës.

Naim Tërnava, kryetar i BIK-ut, tha se është i kënaqur me rrjedhën e fushatës parazgjedhore, e cila sipas tij, është zhvilluar kryesisht e qetë, pa ndonjë ekses serioz dhe ka dëshmuar një vetëdije dhe kulturë të lartë të popullit shqiptar të Kosovës.

“Shpresoj se me daljen tonë të qetë në zgjedhje do t’i tregojmë mbarë botës se e meritojmë Kosovën e pavarur dhe sovrane dhe se vota jonë është vota e pavarësisë së vendit tonë”, tha ai.

Në fund Tërnava uroi që zgjedhjet të kalojnë mirë e qetë, ndërsa prej atyre që do të marrin votëbesimin kërkoi punë, angazhim, sinqeritet dhe marrjen me probleme që e preokupojnë këtë popull si varfëria, papunësia, krimi i organizuar etj.

Ndryshe Bashkësia Islame e Kosovës është institucion religjioz, i cili përfaqëson besimtarët e fesë islame në Kosovë./a.berisha/

Guildmann: Rezultatet paraprake brenda 3 ditëve, kurse finale në fund të muajit

Guildmann: Rezultatet paraprake brenda 3 ditëve, kurse finale në fund të muajitShefi i misionit të Organizatës për Siguri dhe Bashkëpunim Evropian (OSBE) në Kosovë, Tim Guildmann, tha se rezultatet paraprake të zgjedhjeve komunale dhe parlamentare në vend do të publikohen 2 apo 3 ditë pas ditës së mbajtjes së zgjedhjeve, ndërsa rezultati final do të shpallet në fund të nëntorit.

Këto komente u bënë në konferencën për media të Sekretariatit të Komisionit Qendror të Zgjedhjeve (KQZ).

Guildmann tha se rezultatet paraprake të fituesve në zgjedhjet e 17 nëntorit do të publikohen 2 ose 3 ditë pas zgjedhjeve. Ai tha se këto rezultate do të shërbejnë si pikënisje për bisedime politike, si p.sh për formimin e qeverisë.

Ndërkaq, sipas tij, para shpalljes së rezultateve, do të ketë shtatë ditë kohë që partitë politike t’i dërgojnë ankesat e tyre në Komisionin për Ankesa dhe Apele, sa i përket ndonjë parregullsie gjatë numërimit të votave, ndërsa rezultati final shpallet në fund të nëntorit.

Guildmann, duke shpresuar për një votim të suksesshëm dhe masiv, tha se beson që komuniteti serb në tërë Kosovën dhe në veçanti në veri të Kosovës do të dalë në zgjedhje.

Ndërkohë, duke pasur parasysh problemet politike ne vend, Guildmann tha se do të shohin se a do të mund t’i shfrytëzojnë objektet publike që të mundësojnë votimin edhe në këto zona, por gjithsesi sipas tij, ata kanë edhe alternativa tjera, dhe njëra nga këto është duke u ofruar qendra votimi mobile.

“Për ne është e rëndësishme që nëpër të gjithë Kosovën t’iu mundësohet qytetarëve të Kosovës, që të ushtrojnë të drejtën e tyre për të votuar”, tha ai, duke shtuar se në rast se këto ndërtesa nuk mund të shfrytëzohen, atëherë do përdorin qendra votimi mobile të cilat do të dërgohen në këto vendvotime.

“E di që nuk është perfekt, por kështu do të operojmë në mënyrë që t'u mundësojmë të gjithë qytetarëve të Kosovës që të votojnë”, tha ai.

Ndërsa, sa i përket sigurisë në ditën e zgjedhjeve, shefi i misionit të OSBE-së tha se janë duke bashkëpunuar ngushtë me SHPK-në, policinë e UNMK-ut dhe KFOR-in, në mënyrë që këto zgjedhje të jenë të qeta dhe paqësore.

Ndërkaq lidhur me kohën e votimit për një person Guildmann tha ndonëse është paraparë 9 minuta, asnjë person që do të votojë nuk do të ketë nevojë që të nxitojë në vendet e votimit, pasi që do t’i jepet kohë shtesë.

“Çdo person që arrin në qendrën e votimit për të votuar, është e sigurt se do të votojë, pa marrë parasysh se sa do t’i duhet për të votuar, qendrat e votimit nuk do të mbyllen për njerëzit që janë aty. Pra, procesi i votimit mund të zgjas më shume se sa që është paraparë për ata njerëz që kanë ardhur për të votuar”, shpjegoi ai.

Ndërkaq, Mazllum Baraliu, shef ekzekutiv në KQZ, tha se është bërë një punë shumë e madhe nga ekipet e KQZ-së, të cilat janë ndihmuar nga OSBE-ja dhe institucionet ndërkombëtare.

“Janë bërë përgatitjet dhe çdo gjë është gati. Shpresojmë që qytetarët duke qenë të vetëdijshëm për rëndësinë e këtyre zgjedhjeve, të marrin pjesë dhe të dëshmojnë edhe një herë gatishmërinë e tyre për avancimin e proceseve demokratike në Kosovë dhe për t’i dëshmuar para botës se kosovarët dinë kur duhet vepruar dhe dinë të zgjedhin”, tha ai.

Ndryshe, nga ora 07.00 deri në orën 19.00, të shtunën më 17 nëntor, do të zhvillohen zgjedhjet e përgjithshme dhe lokale në Kosovë.

KQZ kësaj here ka shtuar për 35 për qind numrin e vendvotimeve. Në këto zgjedhje, sipas KQZ-së, do të jenë në dispozicion 621 qendra të votimit me mbi 2 mijë vendvotime, ndërsa të drejtë vote kanë rreth 1.5 milionë qytetarë.

KQZ-ja ka hapur 58 qendra të votimit dhe mbi 600 vendvotime të reja, ndërsa në një qendër votimi, maksimalisht do të votojnë 720 veta, duke e zvogëluar numrin prej 1.200 sa ka qenë në zgjedhjet e kaluara.

Kjo, ndërkaq është hera e pestë pas përfundimit të luftës (1998-1999) që Kosova mban zgjedhje të lira dhe demokratike. Mirëpo, është hera e parë që në këto zgjedhje aplikohet pragu prej 5 për qind, që është kusht për të hyrë në parlament./l.krasniqi/

24 orë rrymë gjatë zgjedhjeve, me kosto të importit 1,2 mil.€

Zyrtarë të Korporatës Energjetike të Kosovës (KEK) thanë të enjten për KosovaLive se 1.2 milion eurot e ndara nga Qeveria e Kosovës dhe UNMIK-u për këtë kompani, kanë mundësuar importin e energjisë elektrike gjatë periudhës së zgjedhjeve, duke siguruar furnizim 24 orë me rrymë për të gjithë konsumatorët.

Zyrtari për informim në KEK, Nezir Sinani tha të enjten se Qeveria dhe UNMIK-u i kanë ndarë KEK-ut, secila nga 600 mijë euro, në mënyrë që gjatë periudhës së zgjedhjeve, duke filluar nga 16 nëntori e deri më 19 nëntor, te ketë furnizim me rrymë pandërprerë.

“Kërkesa ditore për energji elektrike gjatë periudhës në fjalë do të sillet rreth 17,7 gigavatë orë energji elektrike, ndërkaq prodhimi ditor i KEK-ut nga njësitë e veta gjeneruese do të sillet rreth 15,4 gigavatë”, theksoi ai.

Sinani tha se për të ofruar furnizim të rregullt me energji elektrike gjatë kësaj periudhe, KEK-u do të importojë energjinë e nevojshme për të mos aplikuar reduktime për konsumatorët e vet, ku gjatë një dite do të importohen 2,3 gigavatë orë energji elektrike.

Sipas tij, furnizimi me energji elektrike gjatë kësaj kohe do të mund të ndryshojë në rast të ndonjë prishjeje në rrjet apo problemeve me njësitë gjeneruese të KEK-ut.

KEK-u apeloi tek të gjithë qytetarët që të kursejnë rrymën, në mënyrë që të evitohen ndërprerjet e dhunshme të energjisë elektrike si pasojë e mbingarkesës së rrjetit të shpërndarjes. /r.mehmeti/

Sonte i jepet fund fushatës 21 ditëshe zgjedhore në Kosovë

Pas 21 ditëve fushatë parazgjedhore, partitë politike, iniciativat qytetare dhe kandidatët e pavarur, garues në zgjedhjet 17 nëntorit, të enjten (sonte) në ora 24:00 të mesnatës, do t’i japin fund fushatës së tyre elektorale.

Ndërkaq të gjithë ata kandidatë që mbajnë tubime zgjedhore pas kësaj kohe, shkelin rregullat e Komisionit Qendror të Zgjedhjeve (KQZ), dhe rastet e tyre do të trajtohen nga Komisioni për ankesa dhe apele.

Sipas rregullores së KQZ-zë, gjatë periudhës 24 orëshe para hapjes së vendvotimeve për zhvillimin e votimeve e deri në mbyllje të tyre, subjekteve politike dhe përfaqësuesve të tyre u ndalohet kryerja e çfarëdo lloj aktiviteti që lidhet me fushatën e zgjedhjeve.

U ndalohet mbajtja e takimeve për qëllime të fushatës së zgjedhjeve, shfrytëzimi i megafonave ose i sistemeve të tjera për t’iu drejtuar publikut kudo qoftë në Kosovë me qëllim të ndikimit në votues, ose organizimi i çfarëdo manifestimi, procesioni ose demonstrate të natyrës politike ose pjesëmarrja në të.

Pastaj ndalohet shitja, furnizimi, blerja, shërbimi ose konsumimi i pijeve alkoolike më afër se 100 metra nga cilado qendër e votimit në ditën e zgjedhjeve, shfrytëzimi i mediave lokale ose ndërkombëtare me qëllim të ndikimit në votues, zhvillimi i çfarëdolloj fushate të zgjedhjeve në objektet e qendrës së votimit, mbajtja e kartelave të zgjedhjeve, distinktivëve ose e shenjave të tjera të zgjedhjeve nga anëtarët e këshillit të vendvotimit, vëzhguesit e akredituar ose votuesit në ditën e zgjedhjeve.

Gjithashtu, gjatë këtyre 24 orëve, ndalohen rezultatet e anketave të hulumtimit të opinionit publik ose analizat në lidhje me qëllimet e votimit të zgjedhësve në zgjedhje, nuk duhet të publikohen ose t’i kumtohen publikut gjatë kësaj periudhe, duke filluar pesë ditë para hapjes së vendvotimeve dhe duke përfunduar me mbylljen e votimeve.

Ndërkaq, shumë parti politike si Lidhja Demokratike e Kosovës (LDK), Partia Demokratike e Kosovës (PDK), Partia Reformiste ORA, Partia e Drejtësisë (PD) dhe disa subjekte tjera, fushatën e tyre elektorale do ta përmbyllin në Prishtinë. Të tjerat, ndërkaq në qytete të ndryshme të Kosovës.

Zgjedhësit kosovarë, ndërkaq pritet të kenë përpara vetes më 17 nëntor 97 oferta për votim në nivelin lokal dhe qendror të qeverisjes, për mandatin e ardhshëm të institucioneve të Kosovës, ndërkohë që përveç entiteteve politike shqiptare, në garë do të jenë edhe përfaqësuesit e pakicave, përfshirë këtu edhe serbët.

Ndërsa me një vendim të Ministrisë së Arsimit, Shkencës dhe Teknologjisë, të gjitha shkollat fillore, të mesme dhe disa fakultete kanë filluar të përgatiten për të shërbyer si qendra votimi për ditën e zgjedhjeve.

Ndryshe, procedura për të votuar në zgjedhjet e sivjetme parlamentare dhe lokale është më e komplikuar se herëve të tjera dhe sipas përfaqësuesve të Misionit në Kosovë të Organizatës për Siguri dhe Bashkëpunim në Evropë (OSBE), procedura e votimit kërkon nga 8 deri 9 minuta kohë.

Drejtori i Departamentit të zgjedhjeve në OSBE, Hugh Fulton ka thënë se për të qenë koha e mjaftueshme dhe për t’u përmbyllur procesi i zgjedhjeve me sukses, KQZ kësaj here ka shtuar për 35 për qind numrin e vendvotimeve.

Në këto zgjedhje, sipas KQZ-së, do të jenë në dispozicion 621 qendra të votimit me mbi 2 mijë vendvotime, ndërsa të drejtë vote kanë rreth 1.5 milionë qytetarë.

KQZ-ja ka hapur gjithsej 58 qendra të votimit dhe mbi 600 vendvotime të reja, ndërsa në një qendër votimi, maksimalisht parashihet të votojnë 720 veta, duke e zvogëluar numrin prej 1.200 sa ka qenë në zgjedhjet e kaluara.

Ndërkaq, për vëzhgimin e zgjedhjeve në Kosovë, para disa ditëve në vend kanë arritur edhe 150 vëzhgues afatshkurtër, të dërguar nga 34 shtete evropiane. Ata pas një trajnimi dy ditor që e kanë mbajtur në Prishtinë, janë sistemohen në grupe nga dy nëpër vende të ndryshme të Kosovës që të vëzhgohen zgjedhjet e 17 nëntorit.

Sipas Misionit të Këshillit të Evropës (KE) ditën e zgjedhjeve, 150 vëzhguesit do të duhet t’i plotësojnë formularët e vëzhgimit që i mbulojnë indikatorët kryesorë, siç janë hapja dhe mbyllja e vendvotimeve si dhe procedurat e përgjithshme të votimit dhe numërimit të votave.

Pastaj, këto informata do të përmblidhen dhe procedohen nëpërmjet internetit nga një grup ekspertësh statistikor.

Ndërsa, ditën e zgjedhjeve, secili grup vëzhguesish mesatarisht do të vizitojë tetë vendvotime, apo 75 grupet vëzhguese, duhet të arrijnë të vëzhgojnë një të katërtën e numrit total të vendvotimeve.

Shifrat e përmbledhura, ndërkaq do të jenë shtylla e deklaratës preliminare e cila është paraparë t’i paraqitet mediave ditën e nesërme pas zgjedhjeve. Gjithashtu, bëhet e ditur se në këtë konferencë do të vlerësohet nëse procesi zgjedhor ishte në përputhje me standardet ndërkombëtare.

Për vëzhgimin e zgjedhjeve Instituti Kosovar për Kërkime dhe Zhvillime të Politikave (KIPRED), në bashkëpunim me 10 organizata joqeveritare kanë themeluar koalicionin “Demokracia në Veprim”, të cilët kanë filluar punën e mbikëqyrjes së fushatës së partive politike 21 ditë më parë.

Koalicionin “Demokracia në Veprim”, në ditën e votimeve, me 17 nëntor, do t’i ketë 2.300 monitorues në terren.

Kjo,është hera e pestë pas përfundimit të luftës (1998-1999) që Kosova mban zgjedhje të lira dhe demokratike. Mirëpo, është hera e parë që në këto zgjedhje aplikohet pragu prej 5 për qind, që është kusht për të hyrë në parlament. /flora loshi/

OSBE fillon fushatën e vetëdijesimit për zgjedhjet e të shtunës

Procedura për të votuar në zgjedhjet e sivjetme parlamentare dhe lokale është më e komplikuar se herëve të tjerë dhe sipas përfaqësuesve të Misionit në Kosovë të Organizatës për Siguri dhe Bashkëpunim në Evropë (OSBE), procedura e votimit kërkon nga 8 deri 9 minuta kohë.

Megjithë kohën e gjatë për votim, zyrtarët e OSBE-së nga Departamenti i Zgjedhjeve, shprehen optimistë se nga ora 07.00 deri në orën 19.00, do të mjaftojë koha për të votuar të gjithë qytetarët e interesuar për të marrë pjesë në zgjedhjet e sivjetme.

Këto komente u bënë të martën në një seancë për edukimin e votuesve që u organizua nga Misioni i OSBE-së në Kosovë. Kjo seancë, sipas tyre, kishte për qëllim, mënyrën e të kuptuarit drejt të procedurës së votimit, pasi që, për herë të parë në Kosovë do të mbahen tri palë zgjedhje në të njëjtën ditë.

“Sipas një studimi që është bërë me punëtorët e OSBE-së dhe ata të Sekretariatit të Komisionit Qendror të Zgjedhjeve (KQZ), koha për të votuar për një votues të informuar, është prej 8 deri 9 minuta”, u shpreh Gazmend Berlajolli, trajnues për votim në KQZ.

Ndërsa, Hugh Fulton, drejtor i Departamentit të Zgjedhjeve në OSBE, tha se për mos me humb kohë votuesit, ata paraprakisht duhet të dinë se për cilin subjekt politik dhe kandidat ti atij subjekti do të votojnë, në mënyrë që procedura të shkojë pa pengesa.

Përkundër kësaj, në çdo vendvotim, siç tha Hugh, do të ketë edhe tavolinat ndihmëse që do të shërbejnë për informimin e votuesve. Megjithatë, zyrtari i OSBE-së, thotë se në Kosovë nuk është e re, mënyra e pjesëmarrjes në zgjedhje, meqenëse qytetarët janë mësuar tashmë me katër parë zgjedhjet e kaluara.

E reja në gjithë këtë proces zgjedhor është se për herë të parë do të votohet me lista të hapura, si dhe njëkohësisht duhet votuar për dy palë zgjedhje, përfshirë edhe zgjedhjet e drejtpërdrejta për kryetarë të komunave. Prandaj votuesi para vetës ka tri lista për votim dhe ka të drejtë të votojë për një subjekt politik në fletëvotimin e parë, ndërsa për një subjekt tjetër në fletëvotimin e dytë.

Lista që është shënuar me ngjyrë të kuqe, është e determinuar për zgjedhjet parlamentare. Votuesi me këtë rast duhet të zgjedh njërin nga subjektet politike që preferon, ndërsa në anën e djathtë ka numrat e shënuar të kandidatëve të të njëjtin subjekt të cilët i zgjedh përmes një broshure që shkon bashkë me fletëvotimin.

Lista tjetër që ka ngjyrën e kaltër është e determinuar për zgjedhjet lokale, ndërsa forma e votimit është e njëjtë sikur ajo e zgjedhjeve parlamentare. Edhe në këtë fletëvotim, votuesi orientohet përmes broshurës ndihmëse për t’i nënvizuar dhjetë këshilltarët e preferuar për Kuvend Komunal.

Ndërsa lista e tretë, ajo për kryetarë të komunave, është e nënvizuar me ngjyrë të verdhë dhe është më e thjeshtë, në të cilat votuesi e shënon vetëm kandidatin e preferuar për kryetar komune.

Çdo votues në dy rastet e para, ndërkaq ka të drejtë të shënojë dhjetë kandidatët e preferuar për deputetë në Kuvendin e Kosovës dhe dhjetë kandidatë për këshilltarë në kuvendet komunale. Edhe nëse ky numër tejkalohet, atëherë fletëvotimi, sipas Hugh, nuk do të shpallet i pavlefshëm, por gjatë numërimit të votave do të merren vetëm dhjetë të parët.

Ndryshe, drejtori i Departamentit të zgjedhjeve në OSBE, tha se për të qenë koha e mjaftueshme dhe për t’u përmbyllë procesi i zgjedhjeve me sukses, KQZ kësaj here ka shtuar për 35 për qind numrin e vendvotimeve. Në këto zgjedhje, sipas KQZ-së, do të jenë në dispozicion 621 qendra të votimit me mbi 2 mijë vendvotime, ndërsa të drejtë vote kanë rreth 1.5 milionë qytetarë.

KQZ-ja ka hapur 58 qendra të votimit dhe mbi 600 vendvotime të reja, ndërsa në një qendër votimi, maksimalisht do të votojnë 720 veta, duke e zvogëluar numrin prej 1.200 sa ka qenë në zgjedhjet e kaluar.

Kjo, ndërkaq është hera e pestë pas përfundimit të luftës (1998-1999) që Kosova mban zgjedhje të lira dhe demokratike. Mirëpo, është hera e parë që në këto zgjedhje aplikohet pragu prej 5 për qind, që është kusht për të hyrë në parlament. /m.shefkiu/

OSBE thotë se serbët e shpërngulur mund të votojnë me çfarëdo dokumenti identifikimi

Me afrimin e datës së zgjedhjeve, misioni i OSBE-së në Kosovë, shprehet i i brengosur për atë se si serbët e Kosovës do të mund ta ushtrojnë të drejtën e tyre për të votuar.

Zëdhënësi i OSBE-së Sven Lindholm, në një konferencë për media të mërkurën tha se janë dy mënyra alternative votimi, përfshirë ekipet mobile, për t'u ardhur në ndihmë serbëve që dëshirojnë ta hedhin votën e tyre.

"E drejta për të votuar është e drejtë fundamentale, prandaj duhet të angazhohemi që të gjithë serbët që duan të votojnë të mund ta bëjnë këtë. Ne ende shpresojmë se shkollat do të hapen për të shërbyer si qendra votimi. Por, nëse nuk hapen të shtunën, do të ketë alternativë", tha Lindholm.

Lindholm tha se Komisioni Qendror i Zgjedhjeve i ka lejuar serbët që jetojnë të shpërngulur në Serbi që të votojnë duke dëshmuar identitetin e vet qoftë me një leje njoftimi apo pasaportë ish jugosllave apo serbe.

“Është vendim i KQZ-së dhe duhet ta dini se ka ende njerëz të cilët janë të shpërngulur dhe që nuk kanë mundur të regjistrohen. Ka njerëz që jetojnë jashtë Kosovës dhe që janë regjistruar për të votuar në zgjedhjet 2001 dhe 2002, por që atëherë lista nuk është përditësuar dhe ndryshuar për arsye të ndryshme. Por, vota nuk do të llogaritet për asnjë votues, nëse ai nuk identifikohet", tha ai.

Ndryshe, serbët e Kosovës gjenden nën kërcënime dhe frikësime të shumta që bëhen hapur nga Beogradi dhe elementë ekstremistë brenda vetë strukturave politike serbe në Kosovë, për të mos dalë në zgjedhjet e 17 nëntorit, sado që shumë subjekte politike kanë kandiduar dhe janë certifikuar për të marrë pjesë në to.

Edhe shefi i UNMIK-ut kishte kërkuar muajin e kaluar nga kryeministri serb Vojislav Kostunica të mos i pengojë serbët që duan të votojnë, por UNMIK-u është shprehur i zhgënjyer me reagimin e Beogradit. /sh.mustafa/

Thaçi: Është koha e fundit që PDK t’i fitojë zgjedhjet

Partia Demokratike e Kosovës (PDK) do të jetë formacioni politik më i votuar nga të gjitha partitë tjera në Kosovë dhe do të radhitet subjekti i parë në tri nivelet zgjedhore, deklaroi në një intervistë për KosovaLive, kryetari i kësaj partie dhe i nominuari i PDK-së për kryeministër, Hashim Thaçi.

Ish-drejtori i Drejtorisë Politike të ish-Ushtrisë Çlirimtare të Kosovës (UÇK), Thaçi thotë se partia e tij në këto zgjedhje ka hyrë më e konsoliduar se partitë tjera, me një program konkret politik dhe ekonomik dhe me njerëzit më të përkushtuar për të ardhmen e vendit.

Ndonëse nuk përmend përqindjet, Thaçi shprehet se PDK pashmangshëm do të fitojë, për faktin se “përfaqëson formacionin më të konsoliduar dhe më të fuqishëm politik brenda spektrit politik kosovar”.

Sipas liderit të saj, PDK tashmë është më shumë se sa një parti në kuptimin e ngushtë, një formacion që ka marrë përmasat e një lëvizje shumë-përfshirëse politike e qytetare.

“Kjo lëvizje funksion mbi bazën e një partneriteti të sinqertë dhe të fuqishëm të PDK-së me grupacione të shumta të shoqërisë kosovare, me botën akademike, me ekspertë eminentë ndërkombëtar dhe vendor, me sindikatat e punëtorëve dhe pensionistëve, me mjekë dhe arsimtarë, me biznesin kosovar, me të rinj, mediat, e të tjera”, konsideron Thaçi.

Ky partneritet i fuqishëm, sipas tij, udhëhiqet nga një vizion gjithëpërfshirës për ndryshime që PDK do ta implementojë përmes qeverisjes së saj, duke u fokusuar kryesisht në zhvillimin ekonomik të Kosovës. Programi që ka PDK është hartuar me ekspertët më me renome ndërkombëtare dhe sipas Thaçit, është mirëkuptuar nga qytetarët. “Kjo është garanca e fitores”, shprehet ai.

Lideri i PDK-së kundërshton mundësinë që ndarja në dysh e Lidhjes Demokratike të Kosovës (LDK) e ka “çuar ujin në mullirin e Thaçit”. Ai thotë se fitorja e PDK-së në këto zgjedhje është fitore e ofertës së saj politike dhe ekonomike. “Ky është faktori që përcakton faktin se PDK është dhe do të jetë formacioni i parë politik në Kosovë”, thotë ai.

Kësaj here, sipas tij, ka ndodhur vetëm zhvillimi i mëtutjeshëm i PDK-së si koncept politik, duke u perceptuar, ndërkaq si oferta më serioze dhe më realiste për qytetarët e vendit.

Ndryshe, Hashim Thaçi është i nominuar nga partia e tij për kryeministër të ri të Kosovës, po që se PDK e merr qeverisjen, ndërkohë që ai vet shpreh përkushtimin se ka kapacitet të mjaftueshëm edhe politik edhe atdhetar, për të drejtuar Qeverinë e Kosovës gjatë viteve vijuese.

“Mund ta shikoni përvojën time të gjatë politike dhe do të gjeni përgjigjen për qasjen time ndaj sfidave. Asnjëherë nuk jam frikësuar prej tyre. Besoj fuqishëm në kapacitetet tona për ta transformuar këtë vend nga një vend me probleme strukturore, në një vend me të cilin mund të krenohen qytetarët tanë”, thotë ai.

Edhe nëse bashkëpunëtorët më të ngushtë të tij, Fatmir Limaj, Hajredin Kuçi, Enver Hoxhaj, Bajrush Xhemajli etj, që janë kandiduar për kryetarë komunash, arrijnë të fitojnë, Thaçi thotë se ky nuk është hendikep për formimin e qeverisë së re.

PDK, sipas tij, ka kuadro të mjaftueshme për të qeverisë vendin dhe për t’u përfaqësuar në Kuvendin e Kosovës.

“PDK kurrë nuk ka pasur problem me potencialin kadrovik dhe politik. Gjithmonë kemi qenë një parti e hapur dhe kjo ka bërë që sot PDK të jetë formacioni që bashkon personalitetet më të dëshmuara profesionalisht dhe politikisht në tërë Kosovën, në të gjitha nivelet e qeverisjes. Krahasoni listat dhe do të bindeni në këtë fakt”, thotë ai.

Lideri i PDK-së paraprakisht nuk pranon të tregojë se me cilën parti do të lidh koalicion në qeverisjen e re, ndërkohë që heziton të jep mendimin e tij rreth debutimit të afaristit Behgjet Pacolli në zgjedhjet e sivjetme. “Formulën do ta përcaktojë verdikti demokratik i qytetarëve të Kosovës me 17 nëntor, mirëpo sondazhet tregojnë se PDK po përjeton trendin e një bumi elektoral”, tha Thaçi.

Megjithatë lideri i PDK-së e quan plotësisht manipulim deklarimet e disa subjekteve politike se në Kosovë do të punësojnë dhjetëra mijëra punëtorë. “Manipulimi me shifra abstrakte është mos-respekt për qytetarët dhe hallet e tyre”, shprehet ish kryeministri i Qeverisë së Përkohshme të Kosovës.

Në programin e PDK-së, sipas tij, nuk ka manipulime, por ofertë konkrete dhe garancë e nevojshme përmes të cilës do të krijohen rrethanat e shpejta për uljen e papunësisë dhe varfërisë në Kosovë. Administrata, siç thotë ai, nuk hap vende pune, ndërsa deklarimet e të tjerëve, siç thotë lideri i PDK-së, janë një mashtrim që “bien erë nga e kaluara komuniste”.

Ai tha se PDK ndjek rrugën e politikave që stimulon zhvillimin e shpejtë të ekonomisë, që është parakusht për uljen e varfërisë.

“Unë e kam prezantuar këtë koncept, në të cilin kanë punuar për një kohë të gjatë ekspertë vendorë e ndërkombëtarë, në mesin e të cilëve do të përmendja ekonomistin me famë botërore dr. David Klein”, tha Thaçi.

Ai po ashtu shtoi se programi i partisë së tij parashikon një plan konkret për zhvillimin e sektorit të bujqësisë, meqenëse 60 për qind e popullit të Kosovës, siç thotë ai, jetojnë në zona rurale. PDK do të zbatojë programe për orientimin e kredive dhe investime që do ta transformojnë, sipas tij, bujqësinë kosovare nga një bujqësi vetë-konsumuese, në një bujqësi prodhuese.

“Këtu rëndësi të veçantë do t’i japim politikave për mbrojtën e prodhuesve kosovarë dhe gjetjen e rrugëve për plasimin e prodhimeve të tyre në tregjet e jashtme”, shprehet Thaçi.

Ai po ashtu thotë se edhe buxheti i Kosovës me qeverisjen e tij do të shënojë një rritje të konsiderueshme, por jo më këtë trend të ngritjes, por me një menaxhim tjetër të të hyrave. Thaçi thotë se duhet zbatuar politika të kontrollit të përpiktë të këtyre të hyrave dhe shmangie të plotë të evazionit fiskal.

Ndërkaq në fund, lideri i PDK-së dhe anëtari i Grupit kosovar të Unitetit, Thaçi thotë se Kosova është në prag të shpalljes së pavarësisë. Por, ndryshe nga të tjerët që thonë se Kosova duhet të shpallet e pavarur njëanshmërisht pas 10 dhjetorit, ai thotë se procesi i shtet-bërjes duhet të kryhet në koordinim të plotë me SHBA-në dhe BE-në.

“Në momentin e duhur ne do t’i marrim vendimet e duhura që dalin nga përgjegjësia jonë. Unë angazhohem vazhdimisht për një shpallje të shoqëruar me njohjen. Kjo na duhet, e jo shpalljet e verbëta. Menjëherë pas 10 dhjetorit ne do të kemi agjendën tonë dhe do të lëvizim shpejt”, shprehet Thaçi.

Ndërkaq, kërcënimet e Serbisë se pas shpalljes së Kosovës të pavarur do të mbyllë kufirin me Kosovën, Thaçi i quan fantazma të së kaluarës që i kontribuojnë vetëm izolimit të vetë Serbisë.

Pavarësinë e Kosovës, sipas tij, nuk mund ta kërcënojnë fantazmat e të kaluarës. Me Serbinë, siç tha Thaçi, gjithçka ka përfunduar në qershor të vitit 1999, ndërsa shtetet që mbyllin kufijtë me fqinjët e tyre, sipas tij, prodhojnë vetëm izolimin e vetvetes. /milaim shefkiu-shaip mustafa/

Arrijnë vëzhguesit ndërkombëtar për zgjedhjet në Kosovë

Arrijnë vëzhguesit ndërkombëtar për zgjedhjet në KosovëMisioni i Këshillit të Evropës (KE) për vëzhgimin e zgjedhjeve në Kosovë, konfirmoi të hënën se 150 vëzhgues afatshkurtër, të dërguar nga 34 shtete evropiane, pritet të arrijnë brenda ditës në Kosovë.

Sipas një njoftimi zyrtar, pas një trajnimi dy ditor në Prishtinë, ata do të sistemohen në grupe nga dy nëpër Kosovë si dhe kudo që është e nevojshme që të vëzhgohen zgjedhjet e ardhshme të 17 nëntorit.

Ndër të tjera, mësohet se si vëzhgues të zgjedhjeve 2007 në Kosovë, do të jenë 18 anëtarë nga Kongresi i Autoriteteve Lokale dhe Rajonale në Evropë (Këshilli i Evropës), katër nga Komiteti i Rajoneve (Bashkimi Evropian) dhe shtatë nga Parlamenti Evropian.

Ndërsa, aty ku ka qenë e mundur, sipas këtij njoftimi, në secilin grup të vëzhguesve afatshkurtër është tentuar të balancohet gjinia, kombësia dhe përvoja.

“Në ditët para zgjedhjeve vëzhguesit afatshkurtër, do të bëjnë vizita njohëse në vendvotime të cilat do t’i vëzhgojnë. Ditën e zgjedhjeve, ata do të duhet t’i plotësojnë formularët e vëzhgimit që i mbulojnë indikatorët kryesorë, siç janë hapja dhe mbyllja e vendvotimeve si dhe procedurat e përgjithshme të votimit dhe numërimit të votave”, thuhet në njoftim.

Pastaj, këto informata do të përmblidhen dhe procedohen nëpërmjet internetit nga një grup ekspertësh statistikor.

Ndërsa, ditën e zgjedhjeve, secili grup vëzhguesish mesatarisht do të vizitojë tetë vendvotime, apo 75 grupet vëzhguese, duhet të arrijnë të vëzhgojnë një të katërtën e numrit total të vendvotimeve.

Shifrat e përmbledhura, do të jenë shtylla e deklaratës preliminare e cila është paraparë t’i paraqitet mediave ditën e nesërme pas zgjedhjeve. Gjithashtu, bëhet e ditur se në këtë konferencë do të vlerësohet nëse procesi zgjedhor ishte në përputhje me standardet ndërkombëtare./l.k/

Koha e shkurtër nuk e ka penguar KQZ-në që t'i bëjë të gjitha përgatitjet për zgjedhje

Koha e shkurtër nuk e ka penguar KQZ-në që t'i bëjë të gjitha përgatitjet për zgjedhjeNë 621 qendra të votimit me mbi 2 mijë vendvotime në Kosovë, rreth 1.5 milion qytetarë me të drejtë vote, kanë të drejtë që të marrin pjesë për zgjedhjen e përfaqësuesve të tyre në nivel lokal dhe qendror.

Arianit Osmani, zëdhënës në KQZ tha të hënë për KosovaLive se edhe përkundërt kohës së shkurtër, përgatitjet për zgjedhjet 2007 janë duke shkuar shumë mirë dhe sipas tij, çdo gjë do të jetë gati në ditën e votimit.

“Deri më tani janë kryer të gjitha procedurat e shtypjes së fletëvotimeve dhe të gjitha kanë arritur në KQZ, numri i votuesve me të drejtë vote është mbi 1.5 milion, por kjo shifër ende nuk është definitiv, pasi që votuesit jashtë Kosovës mund të regjistrohen deri më 17 nëntor dhe të aplikojnë për votim”, tha Osmani.

Ai tha se KQZ-ja, për të lehtësuar votimin, ditë më parë, ka hapur fushatën për njoftimin e qytetarëve për mënyrën e votimit, e cila do të vazhdojë deri në ditën e zgjedhje dhe gjithashtu, ka filluar shpërndarjen e 1 milion broshurave, më qëllim të mësimit të qytetarëve për të votuar.

Në anën tjetër, sipas një hulumtimi të Programit të Kombeve të Bashkuara për Zhvillim (UNDP), i titulluar “Raporti i paralajmërimit të hershëm”, vlerësohet se rezultatet e anketës tregojnë që 51 për qind të respondentëve shqiptarë, kanë thënë se kanë vendosur se për kë do të votojnë, përderisa kjo përqindje për votuesit serbë është 20 për qind.

Ndër të tjera, sipas këtij hulumtimi, sa i përket votimit, shumica e shqiptarëve dhe etniteteve të tjera mbështesin listat e hapura të kandidatëve.

Pasi që sondazhi është mbajtur në tetor, disa javë para zgjedhjeve, këto rezultate tregojnë se vendimi për t’i mbajtur zgjedhjet ka qenë me vend dhe se zgjedhjet do të legjitimojnë partitë politike dhe njerëzit në ato parti.

Gjithashtu, hulumtimet janë bërë me qëllim të verifikimit, nëse ka dallim në lidhje me preferencat politike të votuesve, gjinisë, moshës dhe rajonit.

Por, është parë se nuk ka pasur dallime për nga gjinia, ku meshkujt dhe femrat kishin përqindje të ngjashme të preferencave politike dhe të votimit dhe nuk u panë dallime për nga grupmoshat, por kishte dallime të mëdha për nga rajoni.

Ndërkaq sipas një hulumtimi të bërë nga organizata Friedrich Ebert Stiftung, 66 për qind e të anketuarave kanë thënë se do të marrin pjesë në zgjedhjet e 17 nëntorit, 11 për qind theksojnë se me gjasë po, 14 për qind janë deklaruar se nuk do të marrin pjesë në zgjedhje, ndërsa 7 për qind ende nuk kanë vendosur.

Ndërsa për ndikimin e listave të hapura në pjesëmarrjen në zgjedhje, 37 për qind e qytetarëve janë shprehur se pjesëmarrja do të jetë më e madhe, 13 për qind nuk e kanë të qartë ndryshimin, 16% theksojnë se pjesëmarrja do të jetë e njëjtë, ndërsa 11 për qind pohojnë se hapja e listave e ka komplikuar procesin.

Ndryshe, zgjedhësit kosovarë, pritet të kenë përpara vetes më 17 nëntor 97 oferta për votim në nivelin lokal dhe qendror të qeverisjes, për mandatin e ardhshëm të institucioneve të Kosovës, ndërkohë që përveç entiteteve politike shqiptare, në garë do të jenë edhe përfaqësuesit e pakicave, përfshirë këtu edhe serbët.

Ndërsa, para disa ditëve, serbët kanë kushtëzuar pjesëmarrjen në zgjedhje me garancinë se institucionet e dala nga këto zgjedhje nuk do ta shpallin pavarësinë, ndërsa disa parti politike serbe kanë bërë tërheqjen nga gara elektorale për zgjedhjet komunale dhe parlamentare të 17 nëntorit. /luljeta krasniqi/

Këshillat votuese në Pejë të gatshëm për zgjedhjet e 17 nëntorit

Një javë para mbajtjes së zgjedhjeve të përgjithshme dhe atyre lokale në Kosovë, Komisioni Komunal i Zgjedhjeve (KKZ) në Pejë, ka përfunduar zyrtarisht trajnimet e rreth 1 400 anëtarëve të këshillave votuese për 19 qendrat e votimit, me 124 vende votimi, në të cilat mbi 81 mijë votues të komunës së Pejës do të mund të japin votën e tyre.

Trajnimi i këtyre anëtarëve të këshillave votuese, që janë përfaqësues të 24 subjekteve politike dhe kandidatëve të pavarur, të cilat me 17 nëntor dalin në garën zgjedhore në Pejë, sipas Zija Balës, zyrtar ekzekutiv i KKZ në Pejë, ka përfunduar të premten, bazuar në itinerarin e caktuar për mbajtjen e trajnimeve për këshillat e votimit nga ana partive politike.

Mirëpo, ai është ankuar se gjatë këtyre trajnimeve ka pasur mungesa të mëdha të përfaqësuesve të subjekteve politike, të cilat nuk i kanë deleguar rregullisht anëtarët e vet nëpër këshillat e votimit.

Megjithatë, nga 1 400 anëtarë të këshillave votuese, siç tha Bala, janë trajnuar 1 380 prej tyre, të cilët janë të gatshëm që sot për votime, ndërkohë po shikohet mundësia që të bëhet një ritrajnim i mungesave ekzistuese, në mënyrë që ditën e zgjedhjeve, stafi i këshillave votues të jetë sa më komplet.

“Nuk e di arsyen pse kanë munguar në trajnime përfaqësuesit e partive politike, dhe për këtë ne çdo mbrëmje i kemi informuar partitë për mungesën e përfaqësuesit të tyre, por arsyen pse kanë munguar ne nuk e dimë dhe nuk na është thënë nga ata”, tha Bala, të shtunën për KosovaLive, duke mos emëruar partitë politike nga të cilat ka pasur më së tepërmi mungesa në trajnimet e mbajtura ditët e kaluara.

Të gjitha vendvotimet në Kosovë do të monitorohen nga 2 400 vëzhgues të koalicionit monitorues “Demokracia në Veprim”, prej të cilëve 308 do të jenë në pikat e votimit në katër komunat e rajonit të Pejës (Pejë, Deçan, Klinë dhe Istog).

Financimi i këtij projekti monitorues do të bëhet nga organizatat ndërkombëtare: USAID, IREX, IFES dhe NDI, kurse trajnimi i vëzhguesve për këtij koalicioni për këto katër komuna të Dukagjinit ka filluar të shtunën.

“Para dy ditëve, janë mbajtur trajnimet për trajner, ndërsa sot ka filluar trajnimi i vëzhguesve për rajonin e Pejës, të cilët do të monitorojnë të pavarur punën e votuesve, komisioneve dhe të KKZ-ve”, tha për KosovaLive, Veton Mujaj, koordinator i OJQ “Syri i Vizionit”, organizatë e cila në kuadër të koalicionit monitorues “Demokracia në Veprim”, do të monitorojë zgjedhjet në rajonin e Pejës.

Në trajnimet e të shtunës, këta vëzhgues përveç tjerash, do të trajnohen edhe për dërgimin e rezultateve të votimit nga vendvotimet që do të bëhen me ‘sms’ nga telefonat celular, dhe këto rezultate do të shihen drejtpërdrejtë në ekranin e vendosur një sallë të “Hotel Grand” në Prishtinë.

“Të gjithë këta monitorues që janë pjesë e koalicionit ‘Demokracia në Veprim’ do të jenë të pajisur me aparate celulare, ndërsa në kryeqendër është krijuar një server bazë nga ‘Vala’ dhe të gjithë këta ‘sms-a’ do të jenë falas”, tha Mujaj, për të shtuar se ky është modeli i ri i publikimit të drejtpërdrejtë të rezultateve ditën e votimit dhe është një teknologji e re dhe deri tash nuk është përdorur askund në botë dhe.

Kjo metodë është testuar një herë në një bashkësi të Tiranës, kur ka rezultuar me sukses, ndërsa tash kjo metodë do të praktikohet për herë të parë me 17 nëntor në Kosovë. /ilir osmanaj/

Partitë politike premtojnë gjyqësor të pavarur dhe zbatim të ligjit

Sigurimi i sistemit të qëndrueshëm dhe unik gjyqësor në tërë territorin e Kosovës, zbatimi i ligjit, gjyqësori i pavarur etj, janë disa nga premtimet e partive politike gjatë fushatës, të cilat thonë se do t’i bëjnë realitet nëse i fitojnë zgjedhjet e së shtunës së ardhshme.

Në programin zgjedhor të Lidhjes Demokratike të Kosovës (LDK), e udhëhequr nga kryetari i saj Fatmir Sejdiu, thuhet se sistemi gjyqësor është shtyllë e rëndësishme e shtetit dhe mekanizëm potencial për ndryshimet e rëndësishme socio-politike, andaj prioritet i kësaj partie në mandatin e ardhshëm në Kosovën shtet të pavarur, është sundimi i ligjit me subjektivitet ndërkombëtar.

LDK pohon se është e ndërgjegjshme se esenca e demokracisë parlamentare konsiston në shkallën e pavarësisë së pushtetit gjyqësor, andaj në mandatin e ardhshëm të pushtetit qendror preokupim tjetër të vetin ka që qytetarëve të Kosovës t’u garantojë pushtet gjyqësor plotësisht të pavarur dhe të pandikuar nga pushteti legjislativ, ekzekutiv dhe nga ndikimet nga jashtë (zyrtarët, partitë politike, kërcënimet për vendime që i marrin në mënyrë të paanshme, e tjera).

Pozitën, kompetencat, statusin e gjyqtarit dhe avancimin në pozita më të larta, LDK angazhohet ta realizojë nëpërmjet të buxhetit të veçantë për gjyqësorin për financimin e gjykatave, parime këto të cilat do të sigurojnë gjyqësi të pavarur, në të cilën gjyqtarët do të bazohen në legalitet gjatë gjykimit, në gjy¬kime publike, në barazinë e plotë të palëve para gjyqit... etj.

Preokupim tjetër i LDK–së është reforma gjyqësore, me të cilën synohet shkëputja e plotë me sistemin dhe ligjin e vjetër për gjykatat, me legjislacionin e vjetër, me një strategji nacionale, nëpërmjet të cilës do të forcohej pavarësia e gjyqësisë, efikasiteti i gjykatave, avancimi i kuadrove gjyqësore (i gjyqtarëve dhe i administratës gjyqësore), etj.

Ndërsa, Aleanca për Ardhmërinë e Kosovës (AAK), e udhëhequr nga lideri i saj Ramush Haradinaj, në programin e saj zgjedhor angazhohet që Ministria e Drejtësisë të gëzojë përgjegjësi shtesë të bartura nga UNMIK-u. Përgjegjësitë përfshijnë disa aspekte, por nuk kufizohen vetëm në to: Shërbimin Korrektues të Kosovës, mjekësinë ligjore dhe çështjet që kanë të bëjnë me personat e zhdukur nga lufta e fundit të Kosovë.

Kjo parti. po ashtu angazhohet në bashkëpunimin reciprok ndërkombëtar dhe
çështjet e tjera, të cilat janë të lidhura me statusin juridik të Kosovës, në zhvillimin e
politikave që kanë të bëjnë me të drejtat e njeriut dhe luftimin e krimit të organizuar,
trafikimin e qenieve njerëzore, korrupsionin etj.

AAK-ja angazhohet në reformën e thelluar të gjyqësorit në përputhje me standardet më të mira evropiane duke filluar në riorganizimin e gjykatave, krijimin e gjykatave të reja, mbrojtjen e pavarësisë së gjyqësorit mirëpo duke garantuar një sistem efektiv për vlerësimin e gjyqësorit, ku gjyqtar dhe prokuror që kanë vepruar në kundërshtim me ligjin dhe kodin etik nuk do të ushtrojnë më profesionin e tyre pas përmbushjes së procesit të vlerësimit etj.

Partia Reformiste ORA, e udhëhequr nga Veton Surroi, angazhohet për sundim të ligjit, reformimin e plotë i sistemit gjyqësor dhe shtimi i kapaciteteve gjyqësore dhe të sigurisë si preokupime kryesore të saj.

Disa nga parimet e ORA-s janë që qeverisja e Kosovës të rrjedhë nga Kushtetuta, e cila do të siguronte përgjegjësinë dhe kontrollin ligjor mbi udhëheqësit, përpilimin e ligjeve që marrin për bazë rrethanat reale kosovare, ato ligje që janë të garantuara për t’u realizuar, të shqyrtuara mirë nga buxheti etj.

ORA në programin veprues menjëherë do të bëjë unifikimin e të gjitha ligjeve brenda një sistemi kushtetues-ligjor, që Kosova të ketë qartësi rreth asaj se cili është ligji i zbatueshëm, e jo të ketë kaos të ligjeve të zbatueshme që garojnë ndërmjet veti.

Aleanca Kosova e Re, në krye me Behgjet Pacollin, ndërkaq angazhohet që në Parlamentin e Kosovës të përpilohen ligje të kuptueshme, të thjeshta dhe të qarta, në të cilat definohen të drejtat dhe detyrimet e qytetarit pa mundësi anashkalimesh, duke u përcaktuar shumë qartë veprimet, cilësia e veprimeve dhe koha.

Katër shtyllat e qeverisjes funksionale sipas kësaj partie do të jenë: presidenti i zgjedhur nga qytetari (“ne synojmë që këtë ta bëjmë të mundur me ligj”), parlamenti, sistemi gjyqësor, qeveria. Shtyllat e shtetit duhet të koordinohen, të harmonizohen për të qenë funksionale në interes të qytetarit dhe shtetit.

Ndërsa, për Lidhjen Demokratike të Dardanisë (LDD), e udhëhequr nga akademik Nexhat Daci, në programin e saj zgjedhor tregon se shteti i së drejtës është kushti themelor, njëkohësisht bazë e çdo shteti demokratik.

Detyra kryesore e shtetit sipas kësaj partie, qëndron në sigurimin e të drejtave juridike me qëllim të funksionimit të qëndrueshëm të rendit juridik, sigurisë së brendshme dhe jetësimit të vlerave themelore të rendit demokratik.

Koalicioni LDD-PSHDK, angazhohet për funksionim të shtetit juridik dhe udhëheqje të politikës, e cila mbështetet në: sigurimin dhe garantimin e së drejtës për të gjithë qytetarët që të jenë të barabartë para ligjit, ndërmarrjen e hapave konkret në forcimin e vlerave dhe besimin e qytetarëve në të gjitha institucionet, duke fuqizuar rolin e legjislativit, organizimin dhe fuqizimin e mekanizmave të shtetit ligjor në luftën e pa-kompromis ndaj kriminalitetit, korrupsionit, kontrabandës, trafikimit, etj.

Të gjitha këto parti janë të bindura se do të dalin fituese pas zgjedhjeve të 17 nëntorit, dhe janë të bindura se premtimet e dhëna do t’i bëjnë realitet, që qytetarët e vendit të kenë jetë më të mirë. /t.hykolli-gashi/

Kryeziu: Jap dorëheqje nëse LDK nuk i fiton më shumë se 40% të votave

Nënkryetari i parë i Lidhjes Demokratike të Kosovës, Eqrem Kryeziu, në një intervistë për KosovaLive, deklaron se nëse LDK, në zgjedhjet e 17 nëntorit nuk arrin të fitojë më shumë se 40 për qind të votave të elektoratit të Kosovës, ai do të jep dorëheqje nga kryesia e këtij subjekti.

Kryeziu i cili për disa vite ka qenë nënkryetar i LDK-së, por që njihet si njeriu që i koordinon të gjithë punët e këtij subjekti, është optimist se LDK edhe në këto zgjedhje do t’i prijë ranglistës së spektrit politik të Kosovës. Madje, ai beson se Lidhja Demokratike e Kosovës do ta kalojë kuotën prej 40 përqindëshit.

“Nëse nuk i fitojmë 40 për qind, unë kam paralajmëruar dorëheqjen time. Nuk jam njeriu i parë i LDK-së, por jam i dyti qe dhjetë vjet e më tepër”, u shpreh mes tjerash nënkryetari Kryeziu, i cili për dy mandatet të kaluara ka drejtuar komunën e Prizrenit.

Sipas tij, LDK edhe në këtë garë zgjedhore pashmangshëm është subjekti më i denjë dhe më besnik i elektoratit kosovar, që patjetër duhet të fitojë. Madje, thotë se nëse LDK si subjekt i “regjur” nëpër situata të ndryshme dhe me traditë nuk arrin ta qeverisë vendin, atëherë “Kosovën e morri djalli”.

Kryeziu pohon se kjo nuk është frazë që ka dalë nga vetë ai, por është artikuluar nga përfaqësuesit tjerë të partive politike, se pa LDK-në Kosova nuk ka të ardhme.

“Ndonjëherë bëj shaka, por nuk e teproj. Unë kam mjaft shokë në PDK, sepse Kosova është e vogël, dhe ata kanë thënë se nëse nuk fiton LDK, atëherë Kosovën e morri djalli. LDK është garanci për Kosovën”, konsideron Kryeziu.

Numri dy i këtij subjekti, thotë se LDK ka traditë, ka vizion dhe program shumë konkret zhvillimor për Kosovën, që garanton perspektivë.

“Para së gjithash ne jemi një parti e sprovuar nëpër beteja më të vështira të mundshme që ka kaluar ndonjëherë ndonjë popull në ndonjë vend. Praktikisht, qe 18 vjet i kemi rezistuar robërisë tepër primitive dhe asnjëherë nuk kemi pasur asnjë iluzion. Prandaj një forcë e sprovuar natyrisht që është garanci”, tha Kryeziu.

Sipas tij, jo vetëm për hir të traditës, por edhe për shkak të shumë elementeve të tjera, LDK do të jetë fituese e zgjedhjeve.

“Nuk ka forcë të sprovuar më kredibile se LDK. Unë kam thënë se tani nëse LDK fiton 45 për qind të elektoratit, ajo mund të fitojë edhe 7 vende të tjera nga mbetjet e atyre që s’arrijnë të hyjnë në Kuvend”, tha Kryeziu.

Po ashtu, sipas tij, një element tjetër që e bën LDK-në subjekt plotësisht demokratik, janë edhe reformat që kanë ndodhur brenda këtij subjekti. “Në dy vitet e fundit ne kemi hyrë në reformim të vetvetes dhe kjo është jashtëzakonisht domethënëse”, u shpreh ai.

Nënkryetari i LDK-së apo siç apostrofohet me epitetin “eminenca gri” e këtij subjekti, kundërshton mundësinë që ndarja në dysh e LDK-së do të reflektohet edhe në ndarjen e elektoratit të LDK-së së vjetër.

“Jo, jo, absolutisht Nexhat Daci nuk na i merr votat. Pikërisht përpjekja për të vënë korrektësitë e lidershipit, besoj që do të kemi më shumë simpatizues”, tha Kryeziu duke shtuar se “...nëse një subjekt politik nuk arrin ta ndryshojë vetveten, atëherë nuk ka “hair” nga ai subjekt”.

Përveç këtyre parimeve, kësaj radhe LDK, siç tha Kryeziu, ka ofruar një program zhvillimor me një buxhet prej 1 miliard e 20 milionë euro, duke i ndarë racionalisht dhe sipas nevojës, nga zhvillimi arsimor e deri te ai ekonomik dhe infrastruktural i Kosovës.

I pyetur se sa punëtorë premton t’i punësojë LDK gjatë viteve vijuese, Kryeziu thotë se LDK vetëm bënë politikat reale për investime, “...ndërsa fabrika nuk ndërton”.

“Kur i dëgjoj liderët e nderuar duke dhënë premtime, atëherë them se kjo është e mundur sikur LDK t’ua kryejë punët. Ata vetëm shesin mend me qëllim që të marrin përfaqësimin e Kosovës”, shprehet Kryeziu. Qeveria demokratike të cilët e pretendon LDK, sipas tij, më tepër në rolin e saj do të ketë arbitrarizimin, duke luajtur lojën fer ndërmjet grupeve të interesit dhe jo duke garantuar iluzionisht fonde, etj.

Nënkryetari i LDK-së pranon se ka preferenca se me cilën parti të bëjë koalicion pas zgjedhjeve, por thotë se nuk do ta proklamojë “kurorëzimin para martesës”. Megjithatë, Kryeziu tha se LDK synon që të dominojë në Kuvend e vetme, por për koalicionet eventuale, siç tha ai, vendos Këshilli i Përgjithshëm i LDK-së.

“Preferencat e mija nuk guxoj t’i them. Kam preferenca por s’e them këtë aktualisht”, shprehet Kryeziu.

Ndërkaq, në pyetjen se a e konsideron LDK si rival politik Aleancën Kosova e Re që drejtohet nga afaristi Behgjet Pacolli, i cili ka debutuar në këto zgjedhje, Kryeziu thotë se ai as që llogaritet nga partia e tij, meqenëse “s’ka arrit t’ia mbushë mendjen Kosovës së është i denjë për të marrë pjesë dhe për të fituar në zgjedhje”.

“Nuk e shohim Pacollin rival, sepse ai po manipulon me varfërinë e njerëzve…, mundem me pa si një karkalec që kalon…, nëse është kështu, nëse jo i kërkoj falje. Unë konsideroj se duhet pritë njëherë të na i mbushë mendjen. Unë s’kam kohë të humbas, nëse dëshiron opinioni të humbë kohë, atëherë nuk kam çka të bëjë”, tha ai.

I pyetur nëse Kosova njëanshëm duhet ta shpallë pavarësinë apo të pres derisa të bashkohet më një zë bashkësia ndërkombëtare, Kryeziu konsideron se pavarësia mund të shpallet në çdo kohë, por sipas tij, është e rëndësishme që ajo të pranohet nga shtetet tjera, veçanërisht nga SHBA dhe BE.

“Pavarësia mund të shpallet në çdo sekondë, madje dhe pas gjysmës së natës. Kola (kryeparlamentari i Kosovës) nuk fle deri vonë, sepse nuk e merr gjumi, dhe çdo sekondë mund ta shpallë pavarësinë, por problemi është se a do të na e pranojnë atë pavarësi. Me rëndësi është që të ndodh një solidaritet diplomatik për Kosovën”, shpreh në fund të intervistës për KosovaLive, Eqrem Kryeziu. /milaim shefkiu-shaip mustafa/

Serbët kushtëzojnë pjesëmarrjen në zgjedhje me “garanci” se nuk shpallet pavarësia

Përfaqësuesi i përhershëm i UNDP-së, Frode Mauring, u kërkoi të enjten përfaqësuesve të partive politike serbe që të marrin pjesë në zgjedhjet e 17 nëntorit. Por, disa nga ta u shprehen skeptik rreth pjesëmarrjes së tyre në këtë proces, duke theksuar se problem për ta paraqet paralajmërimi për shpalljen e pavarësisë nga ana e Kuvendit të Kosovës.

Por, Frode Mauring, përfaqësues i përhershëm i UNDP-së në Kosovë, tha se është me rëndësi jetike që të gjitha etnitetet në Kosovë të kenë përfaqësuesit e vet të zgjedhur dhe që të dëgjohet zëri i tyre në institucionet e Kosovës.

Sipas tij, qëllimi i këtij takimi është që partitë politike serbe të informohen mbi punën e UNDP-së në Kosovë dhe të inkurajohet elektorati i tyre të merr pjesë në zgjedhje, në mënyrë që ky komunitet të ketë përfaqësuesit e vet në institucionet kosovare.

“UNDP është këtu për të përkrahur institucionet e Kosovës, për të ndërtuar një të ardhme më të mirë për Kosovën, ndërsa çështjet minoritare janë pjesë shumë e rëndësishme e programeve tona”, tha ai.

Ai theksoi se është me rëndësi të zgjedhen njerëz që flasin për kthimin, për të drejtat e komuniteteve, për lirinë e lëvizjes dhe për integrimin, si dhe shumë tema të tjera që janë pjesë e diskutimeve të përditshme në aleancat politike.

“Është me rendësi që njerëzit e zgjedhur t’i menaxhojnë fondet, të cilat taksapaguesit e Kosovës i japin për kthimin e minoriteteve dhe për përmirësimin e jetës së tyre”, tha ai duke shtuar se çdo votë është e rëndësishme dhe ata njerëz të cilët do të dalin në zgjedhje janë njerëz shumë të guximshëm.

Ndërkaq, ish ministri për Komunitete dhe Kthim (MKK), Slavisa Petkovic, duke kundërshtuar fjalimin e Mauring se UNDP-ja ka ndihmuar kthimin e minoriteteve, tha se UNDP-ja më shumë ka sjell probleme, se sa që ka bërë kthimin e serbëve në Kosovë.

Ndërsa, sa i përket pjesëmarrjes në zgjedhje, Petkovic tha se “Partia Demokratike” të cilën ai e udhëheq, edhe pse janë paraqitur dhe janë certifikuar, nuk do të thotë se do të merr pjesë në zgjedhje, por siç tha ai, këtë do ta vendosin pasi të shohin se si po ecin gjërat deri atë ditë.

“Kjo varet nga shumë gjëra, së pari nga Ekipi Negociator i Kosovës, pasi që ata na kanë borxh një përgjigje se a do ta shpallin më 10 dhjetor pavarësinë, dhe nëse kjo do të ndodh, ne nuk do të jemi pjesë e zgjedhjeve të 17 nëntorit”, tha ai.

Gjithashtu, për mospjesëmarrje në zgjedhje, nëse pavarësia e Kosovës do të shpallet me 10 dhjetor është edhe partia e Dragan Milosevic, partia e Nenad Manovcevic dhe disa të tjera.

Ndërkaq, Branislav Grbic, kryetar i partisë “Demokracia e Re”, tha se pjesëmarrja e serbëve në këto zgjedhje është shumë e rëndësishme.

Ai tha se partia të cilën ai e drejton ofron zhvillim ekonomik, si një faktor kyç për ekzistimin e të gjitha komuniteteve.

“Në këtë kontekst do të jap kontributin. Ekzistenca e serbëve është shumë e rëndësishme, mirëpo kjo ekzistencë mund të bëhet vetëm në bashkëpunim me faktorët tjerë, prandaj enklavat dhe ndarja nuk do të jetë në të mirë të çështjes së Kosovës”, tha ai.

Ndryshe, UNDP-ja ka një spektër të gjerë projektesh që kanë të bëjnë me kthimin dhe re integrimin e pakicave, ku një përqindje e lartë e përfituesve janë të komunitetit serb. Përmes UNDP-së është bërë numri më i madh i kthimeve në Kosovë, krahasuar me çdo institucion tjetër.

Ndryshe, javën e kaluar, Komisioni Qendror i Zgjedhjeve (KQZ) në Kosovë është njoftuar me kërkesën e gjashtë subjekteve politike serbe për tërheqje nga gara elektorale për zgjedhjet komunale dhe parlamentare të 17 nëntorit edhe pse afati për kërkesa të këtilla ka skaduar gati një muaj më parë.

Ndërkaq, në KZQ janë certifikuar rreth 30 subjekte politike serbe. /l.krasniqi/

Daci thotë se nëse nuk i realizon premtimet për një vit do të tërhiqet nga institucionet

Dikur i cilësuar si njeriu i dytë në LDK pas kryetarit të ndjerë Rugova, Nexhat Daci, në një intervistë dhënë për KosovaLive, shprehet optimist se Lidhja Demokratike e Dardanisë (LDD) që drejtohet nga ai, do të jetë partia më me ndikim në Kosovën e pas-zgjedhjeve të 17 nëntorit, e përfaqësuar në Kuvend dhe Qeveri.

Ish-kryeparlamentari i Kosovës, i cili pas përplasjeve në Lidhjen Demokratike të Kosovës, formoi fraksionin e ri me emrin LDD, është optimist për fitore solide në të dy nivelet e zgjedhjeve, edhe në ato lokale edhe në zgjedhjet parlamentare. Madje ai “ka frikë” se nuk do të mund të menaxhojë si duhet të gjithë resorët që do t’i fitojë partia e tij.

Daci tha për KosovaLive se nëse nuk do ta zbatojë qind për qind programin e partisë së tij brenda vitit të parë, ai me gjithë stafin e tij politik do të tërhiqet nga institucionet e Kosovës. Programi i LDD-së, sipas tij, është konkret dhe jo i bazuar në iluzione.

“Daci nuk ka predispozita me shitë ëndrra me sy çelë në mes të ditës. Nuk ka kapacitet të krijojë mjegull në një ditë me diell dhe nuk ka predispozitë as gjenetike as njerëzore të gjuajë në të turbullt…, prandaj me korrektësi them se nëse LDD në qeverisje në vitin e parë nuk i realizon ato që i ofron 100 për qind, Daci do të largohet nga ai institucion me gjithë ekipin e tij”, u shpreh ai.

Daci thotë se ka mbushur gjithherë “hambarët” e LDK-së me vota.

“Mbushësi kryesor i hambarëve të LDK-së me vota ka qenë Daci, pas Rugovës. I pakrahasueshëm. Këtë e kam arrit me intelektualizëm dhe transparencë të plotë. Ajo s’më mungon as tash”, u shpreh ai.

Përkundër ndarjes nga LDK, Daci thotë se me partinë që ka mbetur në shtëpinë e vjetër (LDK), janë “vëllezër” edhe pse demokracia, sipas tij, e përjashton shpesh këtë parim. Ndërsa, ish-kryetari Rugova, sipas tij, ka mbetur “ikona” e pashlyeshme e dy shtëpive politike.

Asnjëra (as LDK e as LDD), sipas tij, nuk ka më shumë, apo më pak hise në emrin e Rugovës, pavarësisht se LDK ka mbushur billbordat me fotot e tij. “Kryetari Rugova dy herë m’i ka besuar postet kyçe të institucioneve të Kosovës, kjo tregon se kam qenë i besuari i tij”, tha Daci.

Ai kundërshtoi, po ashtu, pohimet se njerëzit që kanë mbet në LDK janë më shumë “rugovista” se sa ata që kanë kaluar të radhët e LDD-së. Dalja në bilborda me kryetarin e ndjerë Rugova, sipas tij, nuk është fakt se “ata që kanë mbet në shtëpinë e vjetër i përkasin më shumë filozofisë politike të Rugovës”.

“Askund nuk mund të shihni që ne lypim vota në emër të Rugovës. Ne e kemi shumë seriozisht kur themi se do ta vejmë në vepër vazhdimësinë e filozofisë politike të Rugovës dhe të akademik Fehmi Aganit…,ne jemi vazhdimësi e traditës 17 vjeçare, por me program tjetër dhe me koncept tjetër”, thotë Daci.

Elektorati, sipas tij, do të vulosë edhe fizikisht se kush është më i miri, por mbi të gjitha, ai tha se nuk mëton të jetë trashëgimtar i askujt, edhe pse me xhelozi thotë se e ruan kujtimin dhe respektin për presidentin Rugova, si politikan që ka sjellë diçka të re në ndërrimin e sistemeve.

Ndryshe, Daci gjithmonë ka qenë njeri nga ata që ka shërbyer në parti politike, por asnjëherë nuk e ka drejtuar ndonjë subjekt politik. Me gjithë që nuk është punë e lehtë të mbash “timonin” e një partie, Daci thotë se me “përgatitjet njerëzore dhe profesionale që ka, e adaptojnë edhe në këtë segment”.

Ai tha se nuk është punë e njëjtë sikur të drejtosh një institucion shkencor siç ka qenë Akademia e Shkencave dhe Arteve apo Kuvendi i Kosovës. Megjithatë përvoja, sipas tij, ia ka mundësuar që të adaptohet në mjedisin ku gjendet. Ndërsa për suksesin apo mossuksesin e tij, Daci thotë se tregojnë rezultatet më 17 nëntor.

“Përshtypja që nuk jam shumë i suksesshëm do të shohim rezultatin, i shohim notat në provim”, shprehet Daci, duke treguar përkushtimin e tij se asnjëherë në asnjë proces në jetën e tij, nuk ka hyrë pa ide dhe pa koncept veprimi.

“Analiza bëjmë edhe në LDD dhe unë i marr me rezervë për shkak se njerëzit nga vullneti brenda shtëpisë japin ndonjë vlerësim që mua nuk më mashtrojnë, por jam i bindur që analizat janë aq të fuqishme sa ndonjëherë më frikësojnë sa vërtet a do të gjejmë kapacitet të mjaftueshëm veprues për mos me zhgënjyer elektoratin”, shprehet kryetari i LDD-së.

Madje LDD, siç tha Nexhat Daci, tashmë ka caktuar edhe anëtarët e saj për t’i drejtuar eventualisht institucionet e Kosovës të pas 17 nëntorit. Por, përkundër insistimit të KosovaLive, Daci nuk përmendi asnjë emër.

“…LDD në udhëheqje të Kosovës siguron gjumë të rehatshëm për Kosovën duke marrë njerëzit që janë më të fuqishëm të demonstruar në vepër, shkencë, profesionalizëm dhe luftë”, theksoi ai, duke mohuar, ndërkaq se ndarja nga LDK mund t’i kushtojë me vota.

Edhe Daci, sikurse liderët e tjerë, është i mendimit se në demokraci asnjë parti nuk do të mund të marrë vota të mjaftueshme sa ta qeverisë vetë vendin. Koalicioni, megjithatë është i pashmangshëm, por që LDD, siç thotë lideri i saj, nuk ka ndonjë parti që e ka në objektiv duke qenë e hapur për të gjithë.

“Unë nuk kam hipoteka as nuk kam dashuri për askënd. Nuk do ta përjashtojë askënd. Nuk do ta lusë kurrë, pos perëndisë, askënd për asgjë, dhe do të demonstrojë dinjitet të merituar kudo që të jetë LDD. Mirëpo mund të bashkohemi me ata që ka program të afërt me ne”, u shpreh Daci.

Ish-kryeparlamentari i Kosovës tha se nuk mendon keq për asnjë personalitet dhe subjekt politik në Kosovë, madje as “për ata që janë munduar ta ruajnë Jugosllavinë e vjetër dhe të varrosin dhunën e Milosevic-it, apo për ata persona që nuk kanë pasur sukses kurrë në asnjë lëmi të jetës”.

Daci në fund tha se nuk i sheh si rival në politikë as Pacollin me partinë e tij AKR, e as Surroin me partinë ORA. Ndërkaq, krejt në fund Daci është i mendimit se para pranverës së vitit 2008, nuk do të ketë pavarësi për Kosovën. Të gjitha deklaratat që janë lansuar së fundi, siç tha ai, janë joreale.

“Them se para pjesës së para të vitit 2008 nuk do të ketë pavarësi, por me kënaqësinë më të madhe do t’i kërkoja falje publikut nëse jam gabim”, u shpreh Nexhat Daci. /shaip mustafa- milaim shefkiu/

Di Stasi thotë se bota ka interes për procesin zgjedhor në Kosovë

Misioni i Këshillit të Evropës për vëzhgimin e zgjedhjeve në Kosovë (KEMVZV), konsideron se deri më tani, përgatitjet për zgjedhjet 2007 që pritet të mbahen më 17 nëntor po shkojnë mirë dhe misioni i vëzhgimit është plotësisht operacional dhe i gatshëm të mirëpres 150 vëzhgues që do të arrijnë më 12 nëntor.

Udhëheqësi i Misionit, Giovani Di Stasi, sipas një komunikate të lëshuar për media, gjatë një vizite në selinë e Këshillit të Evropës në Strasburg, ka informuar ambasadorët e 47 shteteve anëtare, për gjendjen e përgatitjeve të këtij misioni.

“Komuniteti Evropian dhe ndërkombëtar janë duke e përcjell situatën në Kosovë. Në veçanti, ambasadorët në Strasburg kanë treguar interesim te madh për këto zgjedhje. Ata janë të bindur që misioni i vëzhgimit është në rrugën e drejtë”, citohet të ketë thënë Di Stasi.

Ndërkohë, njëzet e nënte përfaqësues të zgjedhur lokal, rajonal dhe të nivelit evropian do të jenë pjesë e Misionit për vëzhgimin e zgjedhjeve në Kosovë, të udhëhequr nga Këshilli i Evropës.

Ndër të tjera, mësohet se si vëzhgues të zgjedhjeve 2007 në Kosovë, do të jenë 18 anëtarë nga Kongresi i Autoriteteve Lokale dhe Rajonale në Evropë, katër nga Komiteti i Rajoneve (Bashkimi Evropian) dhe shtatë nga Parlamenti Evropian.

Di Stasi gjithashtu, sipas këtij njoftimi thekson se në misione të tilla është me rëndësi të ketë përfaqësues të zgjedhur në mesin e vëzhguesve dhe numri kaq i madh i personaliteteve të dalluara, tregon qartë rëndësinë që institucionet evropiane i japin procesit demokratik në Kosovë.

Ai vlerëson se duke pasur parasysh që në të kaluarën, misione të ngjashme janë organizuar në një periudhë kohore katër mujore, ky mision është në garë me kohën, një garë të cilën, sipas tij, është duke u fituar./l.krasniqi/

KQZ fillon fushatë për njoftimin e qytetarëve rreth mënyrës së votimit

Zyrtarë të Komisionit Qendror të Zgjedhjeve (KQZ), bëjnë të ditur për KosovaLive se fushata për njoftimin e qytetarëve për mënyrën e votimit fillon me emetimin e spoteve informuese në televizione, ndërsa KQZ-ja dhe OSBE-ja, përkundur kohës së shkurtër deri në zgjedhje, shprehën bindjen se me realizimin e fushatës intensive do të arrijnë t’i njoftojnë qytetarët.

Arianit Osmani, zëdhënës në KQZ, tha për KosovaLive se spotet televizive për informim janë prodhuar dhe janë gati, broshurat do të shpërndahet derë më derë gjatë kësaj periudhe.

Sipas tij, është kontraktuar një organizatë private për shpërndarjen e 1 milion broshurave.

Sipas tij, material tjetër informues për mënyrën e votimit do të shpërndahet edhe nëpër kafene dhe në vende tjera publike, ndërsa fushata për njoftimin e qytetarëve thuhet se do të zgjas edhe pas mbajtjes së zgjedhjeve.

Ai tha se do të vendosen postere të shumtë, të cilët tregojnë në mënyrë praktike-ilustrative procedurën e plotësimit të fletëvotimit, datën e zgjedhjeve, po ashtu posteret do të afishohen edhe në vendvotime, në mënyrë që nëse votuesi ka dyshime mund që paraprakisht të konsultohet edhe në kohën e votimit.

Ai shpjegoi se votuesit do të kenë mundësi të zgjedhin për parlament të Kosovës subjektin politik X, ndërsa për kuvendet komunale do të mund të zgjedhin një subjekt tjetër politik Y, sepse siç tha ai, janë dy fletëvotime të ndara.

Mirëpo, sipas tij, votuesit nuk mund të votojnë për subjektin politik X, ndërsa të votojnë po në të njëjtin fletëvotim edhe për deputetë të partisë Y.
Derisa votuesi do të ketë mundësi të votojë për parti të ndryshme për Kuvend të Kosovës dhe për kuvende komunale në fletëvotime të ndara, qytetarët do të kenë mundësi që të zgjedhin edhe kandidatin e preferuar për kryetar komune nga një subjekt i caktuar politik, ndërsa të votojnë për këshilltarët komunal nga subjekti tjetër partiak.

Kjo sipas tij, do të thotë se qytetarët do të mund të votojnë për kryetar komune, kandidatin nga partia X, ndërsa në fletëvotimin tjetër deputetët për kuvend komune, gjegjësisht këshilltarët komunal t’i zgjedh nga subjekti tjetër politik Y.

Ndërsa, edhe zëdhënësi i OSBE-së, Sven Lindholm, tha për KosovaLive se gjatë këtyre dy javëve do të ketë një numër të madh të shpalljeve nëpër mjete e informimit mbi mënyrën e votimit dhe dukjes së fletëvotimit.

Ai tha se OSBE-ja ka bërë një lloj posteri i cili do të shpërndahet në të gjitha vendet publike dhe në qendrat e votimit, ndërkohë që do të jetë në dispozicion edhe për partitë politike në mënyrë që t’i njoftojnë votuesit dhe simpatizantët e tyre me mënyrën e votimit.

Sipas tij, fushata për informimin e qytetarëve për mënyrën e votimit nuk ka filluar më herët për shkak të periudhës së shkurtër deri në zgjedhje dhe për shkak se KQZ-së, ka dashur të gjejë mënyrën më të qartë të mundshme për sqarimin e votimit.

Ai tha se nuk janë vonuar me fillimin e fushatës, ndërsa shtoi se iu takon edhe partive politike që të mësojnë simpatizantët e tyre me mënyrën e votimit.

Përndryshe në ditën e votimit me 17 nëntor, qytetarët do të mund të votojë për Kuvend të Kosovës, për kuvende komunale dhe për kryetar komune.

Çdo votues do të ketë të drejtë të shënojë dhjetë kandidatë për deputetë në Kuvendin e Kosovës dhe dhjetë kandidatë për anëtarë të kuvendeve komunale, por edhe nëse ky numër tejkalohet, fletëvotimi nuk do të shpallet i pavlefshëm, por gjatë numërimit të votave do të merren vetëm gjashtë pretendentët e parë të shënuar “tik” nga qytetari.
Ndërkaq, për të ofruar shërbime sa më afër votuesit, KQZ-ja ka hapur 58 qendra të votimit dhe mbi 600 vendvotime të reja, ndërsa në një qendër votimi, maksimalisht do të votojnë 720 veta, duke e zvogëluar numrin prej 1.200 sa ka qenë më parë.
Pesëdhjetë aplikacione të subjekteve politike kanë qenë për zgjedhje komunale, 36 për zgjedhje të kryetarëve të komunave dhe 25 aplikacione për Kuvendin e Kosovës.

Ndryshe, kjo është hera e pestë pas përfundimit të luftës (1998-1999) që Kosova mban zgjedhje të lira dhe demokratike. Mirëpo, është hera e parë që në këto zgjedhje aplikohet pragu prej 5 për qind, që është kusht për të hyrë në parlament. Ky “prag” ka ndikuar që shumë parti të vogla politike të lidhin koalicione me partitë e mëdha.

Për zgjedhjet e 17 nëntorit janë të paktë atë të cilët besojnë që sërish do të kemi zgjedhje të cilat do të kalojnë pa ndonjë telashe rreth votimit, pasi që në këto zgjedhje votimet vlerësohen të jenë më të komplikuara se që ka qenë më parë.

Ndërsa edhe partitë politike në vend kanë shprehur shqetësimimin e tyre për kohën e shkurtër për informimin e qytetarëve për mënyrën e votimit. /besnike salihu/

Isufi: AAK do t’i fitojë rreth 20%; Ramushi në Kosovë para qeverisë së re

Nënkryetari i Aleancës për Ardhmërinë e Kosovës, Ahmet Isufi, në një intervistë dhënë për KosovaLive, tha se AAK edhe pse në këto zgjedhje ka hyrë pa “ikonën” e saj, kryetarin Ramush Haradinaj, pretendon që të fitojë rreth 20 për qind të votave të elektoratit kosovar, duke qenë kështu forca bazë e përfshirjes në institucionet e reja.

I cilësuar si njeriu më besnik i ish-kryeministri Haradinaj, i cili aktualisht po ballafaqohet me akuzat e Tribunalit Penal të Hagës, Ahmet Isufi është optimist se AAK me vizionin që ka krijuar “Ramushi” dhe me elektoratin besnik të saj, do të jetë partia më me ndikim në Kosovën e passtatusit.

Ai tha se AAK në këto zgjedhje po hyn pa prezencën fizike të Ramush Haradinajt, por po hyn “Me Ramushin”, me vizionin e tij që ka ndjekë, qoftë si kryetar i AAK-së qoftë si përfaqësues i institucioneve të Kosovës.

“Mungesa e tij po ndihet në kuptimin e angazhimit të drejtpërdrejt dhe fuqisë që ka përcaktuar si lider, por ne tani po punojmë si ekip dhe po mundohemi që tani këtë vakuum ta përmbushim me angazhimin e shtuar me një dinamikë shumë më të theksuar dhe po mundohemi të jemi kudo në çdo pjesë të Kosovës”, tha mes tjerash, Isufi.

Ai, ndërkaq është shumë optimist se Ramush Haradinaj do kthehet nga Haga deri në kohën e “kalkulimeve” politike për qeverisjen e re. Ndryshe, AAK tashmë ka nominuar kryetarin Haradinaj, për kryeministër të Kosovës, në rast se AAK hyn në qeverisjen e re.

Përkundër mungesës së Haradinajt, AAK siç tha Isufi, në bashkëpunim me Grupin e ekspertëve ka bërë një program zgjedhor të cilin do të zbatojë në Kosovën e pas-statusit. Ky program, sipas nënkryetarit të AAK-së, ndryshon në disa nuanca nga programi i kaluar dhe është shumë i afërt me interesat e qytetarëve të Kosovës.

“…tani kemi një program të punuar nga ekspertët e Kosovës përmes Kolegjiumit të AAK-së, të cilit i kanë dhënë brumin e një programi që do të jetë shumë i afërt me interesat e qytetarëve të Kosovës. Bazohemi në prakticizmin dhe në veprimet konkrete”, u shpreh Isufi.

Programi i AAK-së, sipas tij, bazohet në zhvillimin ekonomik, pastaj në rend dhe ligj dhe në mirëqenie sociale.

Këto, siç tha Isufi, janë tri shtyllat kryesore ku mbështet AAK. Po ashtu, ai tha se në kuadër të një administrate funksionale dhe pa kufizime, AAK parashikon krijimin e infrastrukturës për investimet e huaja duke i dhënë përparësi zhvillimit të ndërmarrjeve të vogla dhe të mesme si dhe uljen e tatimeve.

Të gjitha këto, sipas tij, do të gjenerojnë edhe vende të reja të punës. Megjithatë Isufi nuk dha ndonjë shifër se sa punëtorë brenda periudhës vijuese parashikon t’i punësojë AAK. Për të shifrat janë spekulime, sepse numri i punëtorëve do të varet nga parametrat ekonomik dhe krijimi i kushteve për zhvillim të kësaj lëmie.

“Nuk do të spekuloj më shifra se sa punëtorë do t’i punësojmë…Kalkulimi me shifra është në bazë të parametrave ekonomik dhe nuk mund të bëhet me pazare të rrugës”, tha ai.

Ndryshe, numri dy i AAK-së, Ahmet Isufi është tejet optimist se AAK me 18 nëntor, një ditë pas zgjedhjeve, do të jetë një nga shtyllat e spektrit politik të Kosovës që do të ketë një numër solid të ulëseve në Kuvendin e Kosovës si dhe përfaqësim optimal nëpër të gjithë komunat. Madje, disa prej këtyre të fundit, Isufi mendon se AAK do t’i qeverisë vetë, ndërsa në disa të tjerë do të bashkë-qeverisë.

Nënkryetari i AAK-së thotë se partia e tij qëndron shumë mirë në Pejë, Deçan, Gjakovë, Gjilan, Rahovec, Viti, ndërsa relativisht mirë edhe në komunat tjera si Prizren, Kaçanik dhe Besianë, ku sipas Isufit, ka një ngritje të konsiderueshme.

“Me 18 nëntor AAK-në e shohim njërën nga partitë kryesore në politikën e Kosovës dhe pjesëmarrje në institucionet e Kosovës në kuvend dhe qeveri. Rritje do të ketë sepse ne e matim intensitetin e pjesëmarrjes të aktivistëve dhe anëtarësisë sonë në tubime”, tha ai, duke besuar se AAK në këto zgjedhje do të këtë rreth 20 për qind të elektoratit.

Ahmet Isufi, që dikur ka qenë komandant i Zonës Operative të Karadakut të UÇK-së, i kundërshtoi pohimet se kryeministri Agim Çeku ka tradhtuar AAK-në me mospërfshirjen e tij në listën e kësaj partie për Kuvend të Kosovës. Ai tha se kryeministri Çeku nuk e ka dëmtuar në asnjë moment AAK-në, meqenëse mospërfshirja e tij në zgjedhje, është bërë në marrëveshje me AAK-në.

“Me kryeministrin Çeku kemi një marrëveshje që ai të jetë vazhdues i angazhimeve si kryeministër në zgjidhjen e statusit të Kosovës dhe e kemi liruar. Ai edhe më tej është anëtar i AAK-së dhe ka marrë pjesë në tubimet tona dhe do të vazhdojë të marrë pjesë në tubimet e AAK-së. Ai ka luajtur rolin neutral në qeverisjen e vendit dhe e konsideron vetën si kryeministri neutral”, tha Isufi.

Ndërkaq, në pyetjen se me cilën parti do të pranohej më me qejf të bëhej koalicion, të vazhdohej bashkëqeverisja me LDK-në apo më parti tjera, Isufi tha se kjo çështjet është alternativë. Ai tha se me LDK-në i ka shkuar ”kurora” shumë mirë, por AAK si parti e qendrës nuk përjashton mundësitë e koalicionit edhe më partitë tjera.

Në fund, Isufi i AAK-së thotë se nuk frikësohet nga fakti se kësaj radhe në zgjedhjet parlamentare dhe lokale kanë debutuar edhe Nexhat Daci me fraksionin e dalë nga LDK dhe Behgjet Pacolli me Aleancën Kosova e Re. Të dy këto parti, sipas tij, do të marrin votat e “të pa inkuadruarve”, por jo edhe të AAK-së.

“Pacolli e Daci e marrin elektoratin e shpërndarë nga ata që nuk janë shumë të interesuar për zgjedhje, ose nga partitë që nuk kanë arrit të mbajnë vetën të konsoliduar”, u shpreh Isufi.

Sipas tij, nomenklatura e re e Kuvendit të Kosovës që del pas zgjedhjeve duhet të veprojë me maturi dhe shpejtësi dhe të shpallë Kosovën shtet të pavarur dhe sovran.

“Nuk duhet të presim që dikush të na kryejë punën tonë, por atë të bëjmë vetë. Është koha që të ketë definim përfundimtar dhe çdo tentim për ndryshim të pozicionit do të jetë me keq edhe për ne edhe për bashkësinë ndërkombëtare”, tha në fund nënkryetari i AAK-së, Ahmet Isufi. /milaim shefkiu-shaip mustafa

Komisioni ka pranuar 50 ankesa për procesin zgjedhor nga garuesit si dhe votuesit

Shefi i Komisionit Zgjedhor për Ankesa dhe Apele (KZAC), Judge Koster, tha të hënën për KosovaLive se deri më tani, ky komision ka pranuar kërkesa nga 50 subjekte politike të ndryshme dhe qytetarë, ndërkaq këto kërkesa, sipas tij, kanë të bëjnë me decertifikim dhe nuk janë kundër ndonjë subjekti të veçantë politik.

Sipas tij, ankesat dhe apelet kanë mbuluar funksionet e anëtarëve të Komisionit Qendror të Zgjedhjeve (KQZ), anëtarëve të Komitetit të vendit të votimit (KVV), përjashtimin e kandidatëve, përfshirjen dhe përjashtimin e votuesve nga lista e votimeve etj.

Po ashtu, ankesat dhe apelet kanë pasur të bëjnë me aktivitetet e gabuara në fushatë, përmes mediave dhe përmes shkatërrimit të pretenduar të materialeve të fushatës, tërheqjen e kandidatëve nga lista e kandidatëve, kërkesat për ndryshimin e emrave të partive në fletëvotime, kërkesat për përdorimin e gjuhëve shtesë në fletëvotime, dhe kërkesat për financim.

Koster tha se gjatë kësaj jave drafti i parë i vlerësimeve të Komisionit Zgjedhor për Ankesa dhe Apele, do të postohet publikisht dhe çdo palë e interesuar mund t’i shikojë dhe rilexojë vendimet e KZAC-së.

Ndër të tjera, Koster thekson se çdo person që ka interes ligjor në çështje që janë brenda autoritetit të Komisionit, ose ai person të cilit të drejtat i janë cenuar gjatë procesit zgjedhor, mund të dërgojë ankesë në KZAC.

“Personi që dëshiron ta bëjë këtë, duhet të dërgojë një ankesë të shkruar në pajtueshmëri me rregullat e KZAC, në mënyrë që ky Komision ta shqyrtojë çështjen”, tha ai, duke shtuar se çdo shkelje të ligjit për zgjedhje, do të vlerësohet nga KZAC dhe vlerësimet gjithashtu do të publikohen në web faqe të KZAC, si në vitet e mëhershme.

Në anën tjetër, Shërbimi Policor i Kosovës (SHPK), fushatën zgjedhore të subjekteve politike në vend e vlerëson të qetë dhe pa eksese. Ata thonë se deri më tani në tërë territorin e Kosovës, fushata zgjedhore ka shkuar mirë.

Sabrie Kamberi, zëdhënëse në SHPK, tha për KosovaLive se që kur ka filluar fushata zgjedhore, në asnjë tubim zgjedhor nuk është shënuar ndonjë ekses dhe sipas saj, çdo gjë është duke shkuar mirë dhe qetë sa i përket sigurisë.

“Të gjitha subjektet politike kanë njoftuar policinë për kohën dhe vendin se ku do ta mbajnë fushatën dhe pjesëtarë të SHPK-së, kanë kontrolluar terrenin gjatë tërë kohës sa ka zgjatur tubimi”, tha ajo.

Ndërkaq edhe Trupat Mbrojtëse të Kosovës (TMK) nga ana tjetër, kanë shprehur apolitizmin e këtij institucioni ndaj zgjedhjeve.

Përmes një deklarate të lëshuar për media, Shtabi i TMK-së thotë se ky institucion i takon gjithë Kosovës dhe nuk lejon që emblema e saj të “etiketohet” me petkun politik të ndonjë subjekti që garon në zgjedhje.

Reagimi i TMK-së ka ardhur pasi në spotet televizive të disa subjekteve respektivisht të AKR-së e kanë përfshirë TMK-në në kuadër të fushatës së tyre mediale. TMK ka reaguar duke thënë se nuk janë për të penguar fushatën e asnjë subjekti, por qëllimi i tyre është të deklarojë atë që edhe e zotërojnë, paanshmërinë politike.

Ndryshe, deri në ditën kur kosovarët do të dalin në zgjedhjet lokale dhe parlamentare kanë mbetur edhe 12 ditë./l.krasniqi/

Surroi optimist se ORA do të jetë parti bazë e qeverisjes së ardhshme

Kryetari i Partisë Reformiste ORA, Veton Surroi, në një intervistë për KosovaLive, deklaroi për një ngritje solide të partisë së tij në këto zgjedhje, madje shprehet optimist se do të ketë njërën nga partitë bazë në qeverisjen e re, ndërkohë që le të kuptohet se me të cilat parti nuk dëshiron të lidhë “kurorë” në një qeverisje të re.

Veton Surroi, partia e të cilit për herë të parë seriozisht po sprovohet në zgjedhjet kosovare, thotë se posedon një program konkret dhe të realizueshëm që parashikon një Kosovë ndryshe nga kjo që është tani. Një Kosovë ku qytetari i saj do të jetë “zot shtëpie”.

Surroi që shihet në opinion si reformator, në zgjedhjet e kaluara parlamentare ka fituar mbi 5 për qind të votave të elektoratit kosovar. Ai në zgjedhjet e vitit 2004, pati hyrë në garën zgjedhore si Iniciativë Qytetare me emrin ORA dhe, siç thotë ai vetë, e papërgatitur, por megjithatë fitoi shtatë ulëse në Kuvendin e Kosovës.

Në këto zgjedhje Surroi shpreson se është më mirë i konsoliduar, meqenëse rreth vetës ka marrë edhe shumë emra të rinj të politikës dhe publicistikës.

Përkundër insistimit të KosovaLive për të marrë përshtypjen e tij se si do të duket ORA më 18 nëntor, një ditë pas zgjedhjeve, Surroi ndërkaq, nuk dha shifra të përqindjes.

“Ne kemi një ngritje, e theksojmë këtë, por nuk mund të analizojmë këtë në kuptimin e përqindjeve. Po shihet një përkrahje e madhe edhe në zgjedhjet lokale. Dhe, për ne kjo ka qenë sfidë sepse nuk kemi marrë pjesë në këto zgjedhje... jemi bukur mirë”, tha mes tjerash Surroi.

Zgjedhjet lokale, ndërkaq janë të parat për partinë ORA. Kryetari Surroi edhe pse ishte i mendimit se zgjedhjet lokale nuk është dashtë të mbahen aktualisht, thotë se partia e tij qëndron mirë edhe në këtë nivel zgjedhor. Ai madje thotë se ORA ka ofertë shumë të mirë në nivelin lokal, ndërsa nuk ka ndonjë vend “amë” në nivelin qendror.

“Janë disa komuna ku mendojmë se kemi ofertë shumë të mirë. Janë shtatë komuna ku kemi hyrë në një garë serioze, në Prishtinë, Prizren, Gjakovë, Pejë, Mitrovicë, Gjilan dhe Ferizaj. Këtu duhet shtuar edhe Fushë-Kosovën ku kemi një kandidat të fortë për kryetar komune. Edhe në komunat tjera nuk kemi hyrë sa për sy e faqe, por do të kontribuojmë në qeverisje”, shprehet ai.

Kryetari i ORA-s thotë se partia e tij në këtë zgjedhje ka dhënë një ofertë shumë të mirë, për të cilën mendon se do të ndryshojë mënyrën e zhvillimit të Kosovës dhe mënyrën si ecë ajo. “Të gjithë këto ndryshime janë të mundura nëse do të kemi votat e qytetarëve të Kosovës”, shprehet Surroi.

Ai nuk e quan iluzion ofertën për punësimin e 40 mijë kosovareve gjatë qeverisjes së re, e as themelimin e një banke agrare e cila me kredi “të buta”, siç thotë ai, do të mundësonte zhvillimin e bujqësisë dhe blegtorisë kosovare.

“Ideja është që me krijimin e Fondit zhvillimor të Kosovës dhe me krijimin e një banke agrare do të zhvillojmë një cikël të ri investiv. Ne kemi sot mjete të parealizuara publike të ngrira dhe ideja është që duke krijuar mundësi dhe kushte brenda një sistemi të ri ku do të kemi Bankën Qendrore të shtetit tonë, të krijojmë mundësinë që kreditimi të jetë në nivelin e BE-së”, konsideron ai.

Ai po ashtu thotë se Qeveria nuk do t’iu imponojë bankave kuotën e kamatave, por që do të krijojë konkurrencë lojale në sistemin bankar.

“Detyra e një organi shtetëror është që të krijojë konkurrencë në sektorin bankar dhe këtë ta bëjë në atë mënyrë që të gjithë të shohin, jo diktatin e shtetit, por konkurrencën e vetë”, thotë ai duke shtuar se “programi i ORA-s është i zbatueshëm dhe ndryshon mënyrën e zhvillimit të këtij vendi..., është racional”.

Surroi po ashtu në programin e tij ka si prioritet që Kosova e pavarur të menaxhojë me resurset e veta, duke bërë një transformim juridik të pronës. Ai thotë se mjetet që janë marrë nga privatizimi dhe nga Trusti i Kursimeve Pensionale të zhvillohen dhe shfrytëzohen në Kosovë dhe jo jashtë saj.

“Qëllimi ynë është që me automatizëm t’i marrim pronat tona”, konsideron Surroi, duke tërheq vërejtjen se në këtë segment do të zhvillohet një luftë e madhe, sepse ka ide që kjo pasuri e Kosovës edhe më tej të administrohet nga bashkësia ndërkombëtare.

Ndryshe, Surroi gjithë këtë plan parashikon ta implementojë si pjesë përbërëse e koalicionit qeverisës. Mirëpo, aktualisht ai thotë se nuk ka paragjykime se me kë më me qejf do të bënte koalicion.

ORA, sipas kryetarit të saj, as nuk ka ndonjë afërsi të tepërt me cilëndo parti që janë në fushatë, as nuk paragjykon rezultate, kështu që të gjitha çështjet mbeten të hapura deri pas zgjedhjeve. “Do të vlerësojmë pas rezultateve se çka është ajo që na afron me partitë tjera dhe çka do të duhej bashkuar eventualisht në një koalicion”, konsideron Surroi.

Ndërkaq, në pyetjen se a do të kishit pranuar të hyni në koalicion me partinën e Nexhat Daci, Surroi përgjigjet se “kjo është pyetje dyfish spekulative”. “Mendoj se është një pyetje dyfish spekulative, sepse fitorja e Dacit është krejtësisht jashtë çdo realiteti. E dyta është se keqpërdorimi i parasë publike, do të vetëpërjashtonte nga ky proces z.Daci”, thotë ai.

Ndërsa, afaristin Behgjet Pacollin, i cili ka debutuar në këto zgjedhje me AKR-në, Surroi thotë se nuk e sheh aspak si rival politik, as në biznes, për faktin se Surroi thotë se tash ka dhënë dorëheqje edhe juridike nga biznesi.

Veton Surroi tha se e ka dëgjuar programin zgjedhor të Pacollit, por nuk i ka bërë përshtypje. “Kosova si shtet duhet të rregullojë një politikë normale, por kjo është një punë tjetër që të dërgojë argat nga Kosova në Kazakistan”.

Partitë serbe me qëndrime të ndryshme rreth pjesëmarrjes në zgjedhje

Që të mund të dëgjohet zëri i serbëve në Kosovë, është e nevojshme të dilet në zgjedhje, mirëpo thirrja për bojkotim të tyre nuk mungon nga institucionet e Serbisë, u tha të premten në debatin me temë "Zgjedhjet në Kosovë 2007”.

Në debatin "Zgjedhjet në Kosovë 2007, të organizuar në Çagllavicë, ndër të tjera u tha se vendimi për pjesëmarrje në zgjedhje nga partitë serbe ka qenë përfaqësimi i interesave të serbëve në institucionet e Kosovës.

Zëvendës shefi i OSBE-së, Markku Laamanen, tha se nuk është demokratike që t’i shtysh njerëzit me forcë që të dalin në zgjedhje, prandaj është e drejt e tyre siç tha si “...të flenë gjumë apo të votojnë”.

Kryetari i partisë së Pavarur Liberale Slobodan Petrovic, tha se partia e tij merr pjesë për herë të parë në zgjedhje dhe se vendimi për pjesëmarrje ka qenë përfaqësimi i interesave të serbëve në institucionet e Kosovës, të cilët, sipas tij, janë në një gjendje të rëndë.

“...Siç thotë edhe sllogani ynë ‘Jetën në duart tuaja’ , jemi të vetëdijshëm për faktin se ne jemi ata të cilët duhet të sjellim përparim bashkësisë serbe në Kosovë”, tha Petrovic.

Edhe kryetari i Këshillit Ekzekutiv të Partisë Lëvizja e Forca e Serbisë, Dragan Milosevic, pjesëmarrjen në zgjedhjet e 17 nëntorit e ka arsyetuar me respektimin e dëshirë së anëtarësisë së tyre për të dalë në zgjedhje.

“Me dalje në zgjedhje serbët do të kenë më shumë dobi sesa dëm. Çfarëdo statuti të ketë Kosova serbët dhe shqiptarët do të mbetën fqinjë, dhe do të orientohen kah zhvillimi ekonomik,kulturor dhe fqinjësi të mirë”, tha Milosevic.

Ndërsa, përfaqësuesi i Partisë Radikale serbe, Zvonko Mihajlovic ,u ka bërë thirrje serbëve që t’i bojkotojnë zgjedhjet.

Ai tha se serbët nuk kanë besim të plotë në institucionet vendore dhe ndërkombëtare në Kosovë.

“Nuk dëshirojmë që tu japim legjitimitet institucioneve që kanë për qëllim shkëputjen nga sistemi juridik i Serbisë, ndarjen e 15 për qind të territorit të saj dhe themelimin e shtetit të pavarur të Kosovës”, tha ai.

Gjithashtu përfaqësuesit e subjekteve politike serbe të cilat marrin pjesë në zgjedhje biseduan edhe për kërcënimet e bëra në Klinë ndaj serbeve që do të dalin në zgjedhje, dhe kritikuan institucionet e Serbisë për këto kërcënime./b.salihu/

Ruajtja e ambientit pjesë e angazhimeve të partive garuese në zgjedhje

Partitë politike në Kosovë, konkurrente në zgjedhjet e 17 nëntorit, premtojnë angazhime dhe projekte për një ambient të pastër, duke forcuar sektorin për mbrojtjen e mjedisit, eliminimin e faktorëve ndotës të ajrit, në mënyrë që të ruhet, të mbrohet dhe të humanizohet ambienti jetësor.

Partia në pozitë, Lidhja Demokratike e Kosovës (LDK) në programin e saj zgjedhor parasheh të punojë në të gjitha fushat, në mënyrë që të ruhet, të mbrohet dhe të humanizohet ambienti jetësor.

LDK-ja premton modernizim të infrastrukturës në ambientet rurale dhe urbane, eliminimin e faktorëve të ndotjes, siç është:mbyllja e Termocentralit “Kosova A” në Obiliq, që është faktori më i madh i ndotjes së Prishtinës dhe të Rrafshit të Kosovës.

Sipas programit të kësaj partie, duhet të bëhet ndërtimi i termocentraleve të reja moderne me filtrim, pastaj pastrimi i lumenjve dhe i liqeneve, formimi i deponive sipas standardeve ndërkombëtare.

Ata gjithashtu premtojnë se kujdes të veçantë LDK-ja do t’i kushtojë sigurimit të filtrave në komplekset që ndotin ambientin siç janë: Trepça në Mitrovicë, Çimentorja në Han të Elezit etj, pastaj ruajtja e kanionit të Mirushës, Grykës së Rugovës, Grykës së Kaçanikut etj.

LDK–ja do të punojë edhe në planifikimin hapësinor në gjithë Kosovën në funksion të mbrojtjes së shëndetit të njeriut, duke vënë në mbrojtje hapësirat e parqeve dhe të komplekseve nacionale, duke liruar dhe rritur hapësirat e gjelbëruara në qytete dhe vende të urbanizuara dhe duke lejuar vetëm ndërtimin e planifikuar dhe të standardizuar në gjithë hapësirën e Kosovës.

Partia Demokratike e Kosovës (PDK), në programin e saj zgjedhor parasheh forcimin e sektorit për mbrojtjen e mjedisit për të gjitha komunat, pastaj vendosjen e njehsorëve për matjen e ndotjes së ajrit sipas standardeve dhe mbulimin e të gjitha zonave të banuara me rrjetin e ujësjellësit.

Çështje tjetër me prioritet në programin e kësaj partie është vetëdijesimi i qytetarëve për mbrojtjen e mjedisit si dhe zbatimi, plotësimi e ndryshimi i ligjeve që janë në fuqi.

Ndërsa, Aleanca për Ardhmërinë e Kosovës (AAK), sipas plan-programit të saj, në fushën e mjedisit do të angazhohet në zhvillimin e kornizës ligjore dhe institucionale për zhvillimin e mjedisit, arritjen e objektivave në mbrojtjen e shëndetit të popullatës, zvogëlimin gradual dhe eliminimin e pasojave të ndotjes nga e kaluara.

Programi i kësaj partie përfshin edhe përmirësimin e cilësisë së ujit, ajrit dhe të tokës, cilësisë së shërbimeve publike si ujit, mbeturinave dhe kanalizimit, duke përfshirë edhe zgjerimin e tyre në zonat rurale.

Programi i AAK-së parasheh shfrytëzimin e qëndrueshëm të resurseve siç janë: xehet e ndryshme dhe të mjaftueshme në territorin e Kosovës, si dhe zvogëlimin gradual të shfrytëzimit të resurseve kritike si lumenjtë dhe pyjet dhe duke iniciuar programin për rikultivimin e tyre.

Ndërkaq, koalicioni ndërmjet Lidhjes Demokratike të Dardanisë (LDD) dhe Partisë Shqiptare Demokristiane të Kosovës (PSHDK) prioritet konsideron hartimin e Planit të Përgjithshëm Hapësinor të Kosovës.

Ata synojnë rregullimin e mirëfilltë urban të qyteteve, urbanizim e fshatrave duke ruajtur traditën fshatare, ndalimin e ndërtimeve ilegale dhe trajtimin adekuat të objekteve të ndërtuara pa leje.

Programi zgjedhor i këtij koalicioni gjithashtu parasheh angazhim të veçantë në marrjen e masave rigoroze ligjore për t’iu kundërvënë dëmtimit të mjedisit, njëkohësisht duke fuqizuar mekanizmat institucionalë, duke i kushtuar kujdes të veçantë parqeve nacionale dhe pjesëve tjera të natyrës, të cilat nuk janë nën mbrojtje ligjore.

LDD dhe PSHDK gjithashtu do të angazhohen për krijimin e deponive sipas standardeve ndërkombëtare, trajtimin dhe riciklimin e hedhurinave, menaxhimin dhe eliminimin e ndotësve potencialë të mjedisit siç është TC “Kosova A” etj.

Partia reformiste ORA do të insistojë që, Qeveria të ketë për obligim të merr masa të duhura për ndalimin e ndotjes me përmasa të mëdha në sistemet e tanishme prodhuese dhe të trafikut, së pari duke e plotësuar bazën ligjore të mangët, dhe së dyti duke korrigjuar qëndrimin e vet ndaj zhvillimeve të mëtutjeshme të vendit, pra të punojë në një zhvillim të qëndrueshëm të saj.

ORA në planin e saj zgjedhor parasheh zhvillim ekonomik krah për krah me mbrojtjen e ambientit, duke insistuar formimin e organizmave efikas ndër-ministrorë që kanë për detyrë të ndërtojnë projekte me karakter “zhvillimor” dhe njëkohësisht “ekologjik”.

Parimet e përgjithshme të angazhimit të kësaj partie në sferën e mjedisit janë: përpilimi i një baze të fortë legjislative për të mbrojtur ambientin; jetësimi i mirëfilltë i Direktivës për Vlerësim të Ndikimit në Mjedis; përpilimi dhe jetësimi i një sistemi për monitorimin e ndotjes, përpilimi dhe implementimi i parimit “ndotësi paguan”, etj. /rina mehmeti/

Programet e partive premtojnë sistem perfekt shëndetësor

Fondi për sigurimet shëndetësore, Instituti Kombëtar Shëndetësor, Instituti Onkologjik, ai i kardiokirurgjisë, furnizimi me barëra të mjaftueshme për shëndetësinë vendore, përmirësimi i kushteve për pacientin dhe punëtorët shëndetësorë, janë disa nga premtimet që shumica e partive politike kanë në programet e tyre zgjedhore, të cilat premtojnë se do t’i realizojnë nëse i fitojnë zgjedhjet e 17 nëntorit.

Lidhja Demokratike e Kosovës (LDK), që aktualisht qeverisë vendin së bashku me subjektin tjetër politik, Aleancën për Ardhmërinë e Kosovës (AAK), sektorit të shëndetësisë i qaset me prioritet për hartimin dhe zbatimin e politikave shëndetësore që sigurojnë parandalimin e sëmun¬djeve të ndryshme, diagnostifikim dhe trajtimin adekuat të sëmundjeve si dhe zhvillimin e kapaciteteve të reja profesionale e materiale.

LDK vëmendje të veçantë në programin e saj zgjedhor i kushton shëndetit të popullatës si parakusht për një shoqëri të shëndetshme dhe të aftë të krijojë vlera për veten e saj, për ekzistencë të mirë dhe një sistemit shëndetësor unik.

Kjo parti premton se do të angazhohet në kujdesin parësor shëndetësor (mjekësia familjare), kujdesin dytësor shëndetësor (spitalet e përgjithshme), kujdesin tretësor shëndetësor (Qendra Klinike Universitare), kujdesin stomatologjik, kujdesin për shëndetin mendor, edukimin e vazhdueshëm profesional, financimin e sektorit të shëndetësisë, sektorin farmaceutik, sektorin privat, Institutin onkologjik, edukim të kuadrove etj, për të gjithë qytetarët pa dallim etnie.

LDK angazhohet për ngritjen e kapaciteteve këshilluese dhe të përkujdesjes për shëndetin e nënës dhe fëmijës, me synim uljen, në kufij të pranueshëm, të vdekshmërisë së të porsalindurve në Kosovë. LDK angazhohet për parandalimin e sëmundjeve si TBC, HIV/AIDS etj.

LDK angazhohet për organizimin më të mirë dhe funksionalizimin e QKUK si ofruesin e vetëm publik të këtij lloji të shërbimeve, angazhohet për menaxhim funksional, ekonomik dhe transparent të QKUK–së. Ngritja e pagesës për punonjësit shëndetësorë në sektorin publik paraqet sfidë më vete për këtë parti, po ashtu ngritja e fondit për sigurimet shëndetësore etj.

Ndërsa, për Partinë Demokratike të Kosovës (PDK), sipas doktor Salih Ahmetit, prioritet do të jetë reformimi në administrimin dhe menaxhimin e institucioneve shëndetësore-reformat në sistemin shëndetësor, sigurimi shëndetësor dhe financimi në shëndetësi duke aplikuar sigurimet shëndetësore.

Prioritet tjetër i kësaj partie do të jetë investimi në resurset humane (njerëzore) si: specializimet, edukimi i vazhdueshëm i personalit mjekësor, ndarja e specializimeve sipas nevojës dhe planifikimit, edukimi i kuadrove brenda dhe jashtë vendit.

Instituti Kombëtar për Shëndetësi Publike, po ashtu është prioritet i PDK-së, ofrimi i shërbimeve mjekësore dhe cilësore në qendër të vëmendjes do ta ketë pacientin, rritja e pagave të punëtorëve shëndetësorë etj.

Për AAK-në, krijimi i fondit për sigurimet shëndetësore, financimi adekuat, menaxhimi adekuat i institucioneve shëndetësore, vënia e rregullit në sektorin e mjekësisë familjare dhe specializimi i kuadrove në këtë fushë është prioritet i kësaj partie, sipas doktoreshës Zylfije Hundozi.

AAK-ja sipas saj do të angazhohet për kuadro profesional në fushën e shëndetësisë, për pagat e punëtorëve shëndetësorë, edukimin e vazhdueshëm profesional etj. Po ashtu kjo parti angazhohet që të gjitha institucionet shëndetësore ekzistuese të funksionojnë dhe do të fokusohen edhe në ndërtimin e institucioneve tjera shëndetësore që i mungojnë vendit.

Për Partinë Reformiste ORA, sipas Fatmire Mullhaxha-Kollçakut, prioritet në sektorin e shëndetësisë do të kenë shërbimet preventive, fondi për sigurimet shëndetësore, mjekësia familjare etj.

Po ashtu, kjo parti angazhohet në luftën e sëmundjeve ngjitëse që është edhe projekt i fushatës së mijëvjeçarit, luftimin e kërcënuesve të shëndetit, sigurimin e ujit të pijes të shëndetshëm për qytetarin, shërbime cilësore publike shëndetësore, duke mos anashkaluar edhe sektorin privat dhe të drejtat që duhet t’i ketë si konkurrent.

Ndërsa Lidhja demokratike e Dardanisë (LDD), synon reformën shëndetësore dhe zhvillimin e një sistemi efikas shëndetësor, angazhohet për një sistem shëndetësor të decentralizuar, për një financim të qëndrueshëm të sistemit shëndetësor, ndërsa kujdes të veçantë i kushton ngritjes së cilësisë dhe reformimin e mirëfilltë të sistemit shëndetësor (në kujdesin primar, sekondar dhe terciar).

LDD-ja mbështet mbrojtjen e plotë shëndetësore, për këto kategori: fëmijët, bonjakët, veteranët dhe invalidët e luftës, si dhe të moshuarit mbi moshën 65 vjeçare. LDD-ja do t’i kushtojë vëmendje të posaçme krijimit të planit kombëtar strategjik për menaxhimin e Departamentit të Emergjencës me diagnostika mjekësore, në të gjitha nivelet e kujdesit shëndetësorë.

Prioritete të veçanta të LDD-së janë krijimi i institucioneve të reja dhe realizimi i atyre ekzistuese: Instituti i Onkologjisë dhe Radioterapisë, Klinika e Kardiologjisë, Klinika e Traumatologjisë, Instituti për nënë dhe fëmijë, Instituti i Toksikologjisë.

Aleanca Kosova e Re (AKR), në vitin e parë të qeverisjes premton formimin e fondit për sigurime shëndetësore, do të zbatojë programet ekzistuese në mjekësi, do t’i krijoj kushte dhe hapësirë mjekësisë private, do të krijojë dhe zbatojë marrëdhëniet në mjekësinë primare me 70 për qind, mjekësinë sekondare 25 për qind, atë terciare me 5 për qind.

AKR-ja do të ndërtojë dhe rindërtojë hapësira të dinjitetshme shëndetësore, personelit mjekësor do t’i krijoj kushte më të mira (paga dhe hapësirë të mjaftueshme për punë), do të realizojë Institutin Kombëtar të Shëndetësisë, furnizimin me barëra nga kompani të besuara për kualitet etj.

Të gjitha këto premtime të disa partive politike i kanë të paraqitura në programet e tyre zgjedhore, që konkurrojnë në zgjedhjet e 17 nëntorit, e që janë të bindura se do të qeverisin me vendin. /teuta hykolli-gashi/

Partitë premtojnë mirëqenie sociale me mundësi të barabarta për të gjithë qytetarët

Partitë politike që aspirojnë t’i marrin përgjegjësitë për të qeverisur vendin në mandatin e ardhshëm, në programet e tyre zgjedhore, premtojnë se do të sigurojnë prosperitet dhe mirëqenie sociale me mundësi të barabarta për jetë dhe punësim për të gjithë qytetarët, pa marrë parasysh moshën, gjininë, përkatësinë etnike apo aftësitë e tyre.

Të gjitha partitë politike shqiptare që garojnë në zgjedhjet e 17 nëntorit, përveç tjerash, premtojnë se do të themelojnë Fondin e barazisë ekonomike, Fondin pensional të Kosovës, nga i cili do të paguheshin të gjithë pensionistët e Kosovës me pensione të dinjitetshme, ngritje të rrogave në shërbime publike dhe sektorin privat.

Lidhja Demokratike e Kosovës (LDK), premton se do të rrisin kapacitetet dhe efektivitetin e tyre, duke përkrahur konkurrencën e barabartë të femrave dhe të rinjve në përfaqësim e një qeverisje në të gjitha fushat e jetës institucionale e shoqërore, në siguri, administratë publike, politikë, ekonomi, arsim dhe në treg të punës.

Ndërkaq, Partia Demokratike e Kosovës (PDK), premton se do të angazhohet për institucionalizimin e një fryme të re sociale, që konsiston në krijimin e kushteve të barabarta, për progres të çdo qytetari të Kosovës.

PDK në programin e saj zgjedhor, vlerëson se do të përpiqet të respektojë normat sociale minimale, t’i ndihmojë familjet që të adaptohen në përputhje me ndryshimet dhe t’u ofrojë mundësi të reja atyre familjeve që nuk mund të ndjekin ndryshimet.

Programi i partisë më të madhe opozitare në vend ka për qëllim mbrojtjen e shtresave shoqërore të varfra dhe të mesme mbi të cilët rëndojnë pasojat e luftës. Në mënyrë të veçantë familjet e dëshmorëve, të të burgosurve politikë dhe viktimave të agresionit serbomadh.

Gjithashtu, në programin e tyre zgjedhor, PDK-ja premton se do të angazhohet që të gjithë pensionistëve t’iu ngritën pensionet në 100 për qind dhe do të sigurojë një program për barnat e dhëna nga mjeku për të moshuar.

Në anën tjetër, Aleanca për Ardhmërinë e Kosovës (AAK), sa i përket mirëqenies sociale, pohon se do të mundohen të krijojnë kushte që qytetari të ketë qasje në të mira publike, qasje më të mirë në arsim, në shëndetësi primare dhe po ashtu ta kthejnë dinjitetin e qytetarëve, duke ngritur rrogat në shërbime publike dhe duke rregulluar sektorin privat.

Zyrtarë të AAK-së, theksojnë se ajo çfarë duhet të ndodh në Kosovë, është ekzistimi i agjencive të sigurisë të cilat e kompletojnë strukturën e tanishme të sigurisë.

Ndërkaq, Partia Reformiste ORA, premton se do të angazhohet për prosperitet dhe jetë të lumtur për të gjithë qytetarët e Kosovës, mbështetje sociale dhe për pensione të drejta për të gjithë, përmirësimin e pozitës dhe të statusit të femrës në shoqërinë kosovare, për barazi gjinore, etj.

Gjithashtu, në objektivat e programit të tyre, ORA ka paraparë të angazhohen për zbatim të plotë të Ligjit kundër diskriminimit, përfshirjen dhe mbrojtjen e aftësisë se kufizuar me Kushtetutën e Kosovës, përfshirjen dhe mbrojtjen e komuniteteve pakicë me Kushtetutën e Kosovës, themelimin e këshillimoreve socio-shëndetësore në pikat rurale të vendit.

Ndër të tjera, ORA premton se do të angazhohet për implementim të plotë të Ligjit për punë, që do të garantojë se do të mbrohen të drejtat e të punësuarve si dhe ato të punëdhënësve.

ORA, gjithashtu do të angazhohet për themelimin e Fondit të barazisë ekonomike të quajtur “Krusha e Madhe” me të cilin, nëpërmjet mikrokreditimit, do të ndihmohen aktivitetet shtëpiake të grave që të gjejnë vend në treg, po ashtu, synon themelimin e Fondit Pensional të Kosovës, nga i cili do të paguheshin të gjithë pensionistët e Kosovës me pensione të dinjitetshme dhe që janë pagesë e drejtë për kontributin e pensionistëve në ndërtimin e shoqërisë kosovare.

Vizoni i “ORA-s” është angazhimi për zbatimin e të gjitha neneve të Ligjit për barazi gjinore dhe të Ligjit kundër diskriminimit, pushim më të gjatë për lehonat dhe shtimin e numrit të çerdheve, për foshnjat mbi moshën 6 muajsh, ndërkaq çështja e aftësisë së kufizuar me ORA-n, do të të rregullohet me ligj.

Ora ndër të tjera, premton se do të angazhohet për përmirësimin e standardit jetësor, ndërsa gjithashtu do të punojnë për përpilimin dhe miratimin e Ligjit për komunitetet pakicë.

Ndërkaq, koalicioni Lidhja Demokratike e Dardanisë LDD) dhe Partia Shqiptare Demokristiane e Kosovës (PSHDK), premtojnë se do të angazhohen për mbrojtje sociale për të papunësuarit, duke ofruar politika të avancuara, që nuk kuptohet si pengesë e zhvillimit por si katalizator i saj.

Gjithashtu edhe Aleanca Kosovare e Re (AKR) premton se do të punojë për nevojat e fëmijëve dhe të të rinjve, për nevojat elementare të familjeve, nevojave të veteranëve të luftës dhe invalidëve, do të punojë në ngritjen e dinjitetit të pensionistëve dhe mjekëve.

AKR ndër të tjera premton se do të ndihmojë studentët dhe mësuesit, amviset dhe grupet margjinale, policët dhe ushtarakët, shërbyesit civilë si edhe familjet e dëshmorëve dhe fëmijëve bonjakë, së bashku me kategoritë tjera të rrezikuara për kafshatën e bukës etj.

Ndryshe, institucionet që do të dalin pas zgjedhjeve të 17 nëntorit, do të ballafaqohet me të gjitha problemet sociale që ka Kosova sot, gjendjen e rëndë materiale të një pjese të shoqërisë, rregullimin e sigurimit social e shëndetësor për qytetarët, përkujdesjen për qytetarët në moshë dhe pensionistët, përkrahjen për familjet e reja, përkujdesjen për personat me aftësi të kufizuara etj. /luljeta krasniqi/

Partitë premtojnë hapësirë që të rinjtë ta zhvillojnë potencialin e tyre

Në programet e partive politike që garojnë në zgjedhjet e 17 nëntorit, premtohen projekte e mbështetje për të rinjtë që të jetojë në kushte të cilat do të jenë në gjendje t’i zhvillojnë plotësisht potencialet e veta.

Partia Demokratike e Kosovës (PDK), sipas kryetarit të Rinisë së kësaj partie Memli Krasniqi, prioritet për të rinjtë si parti kanë kërkesat e të rinjve që i kanë marrë nga takimet e mëhershme, po ashtu edhe në konsultim me rekomandimet e dokumentit të bankës Botërore për vitin 2007 që i është dedikuar rinisë, PDK-ja ka hartuar platformën ku bazohet në pesë segmente kryesore:

Ai tha se PDK ka hartuar projekte për arsimimin apo edukimin, punësimin, shëndetin, krijimin e familjeve dhe pjesëmarrjen qytetare e politike.

Te arsimi, sipas Krasniqit kërkesat janë për ndërtimin e një sistemi modern të arsimit në Kosovë, të krijojnë një fond kombëtar për bursa për të rinjtë e talentuar, për punësimin që aktualisht sipas tij kalon 70 për qindëshin kanë projekte për praktika profesionale që të rinjtë të kombinojnë praktikën me mësimin që kur përfundojnë studimet të jenë të gatshëm me përvojë për tregun e punës etj.

Në shëndetësi PDK-ja ka projektin që t’i vetëdijësojë të rinjtë për rreziqet e sjelljeve devijante dhe sëmundjeve ngjitëse seksualisht transmisive, si dhe sëmundje tjera që sipas Krasniqit nuk do të ketë fushatë vetëm një muaj, por 365ditë.

Aleanca e Ardhmërisë së Kosovës (AAK), sipas anëtarit të kryesisë së të rinjve të kësaj partie Valon Tolaj, si prioritet për të rinjtë kanë familjet e reja, studentët, adoleshentët, të rinjtë nga diaspora talentet në fushën e shkencës etj, që sipas tij në projektet e tyre i kanë të specifikuara veç e veç se si do t’i qasen.

Programi i Lidhjes Demokratike të Kosovës (LDK), ndërkaq kryesisht është fokusuar në fushën e Kulturës, ku të rinjtë mund të kenë hapësirë më tepër për zhvillimin e aktiviteteve të tyre.

LDK, në rrafshin institucional, tregon se do të përmbyllet puna në formësimin institucional të Bibliotekës Kombëtare, ndaras nga Biblioteka Universitare, do të puno¬het për modernizim të bibliotekave komunale e ndër-komunale, duke instituci¬onalizuar më fuqishëm një rrjet të shpërndarjes së librit.

LDK-ja do të punojë në investim afatgjatë dhe sistem harmonik arsimimi në fushat e kulturës, që përfshin ruajtjen e formave tradicionale të kulturës auto¬ktone, duke përfshirë edhe artizanatet, por edhe shkollimin e njerëzve për fushat elitare kulturore, që Kosova i ka pasur më të pakta për arsye të ndryshme, poli¬tike apo ekonomike.

Lidhja Demokratike e Dardanisë (LDD), ndërkaq do të angazhohet në përkrahjen e pa-rezervë të artistëve të rinj dhe promovimit të tyre jashtë vendit, angazhohet që rinisë si kategori e veçantë e shoqërisë t’i mundësohet angazhimi i drejtpërdrejtë në të gjitha sferat e jetës, në krijimin e lehtësirave ndaj bizneseve për stimulim të studentëve në punësim. LDD-ja angazhohet për sigurimin e bursave për studime etj.

Ndërsa, për Partinë Reformiste ORA, popullata e Kosovës është ndër më të rejat në Evropë, me gati 70 për qind të popullatës nën moshën 35 vjeçare, ku sipas tyre kjo i jep Kosovës potencial të zhvillohet edhe më shumë por i jep edhe për detyrë shtetit të Kosovës që të punojë për t’u siguruar që kjo rini rritet e jeton në kushte në të cilat ajo do të jetë në gjendje të zhvillojë plotësisht potencialet e veta.

Kështu që në programin e saj ORA parasheh krijimin e një kornize ligjore për pjesëmarrje dhe fuqizim të rinisë, përpilimin e Ligjit për qendrat e rinisë, shtimin e bashkëpunimit me organizatat rinore, nëpërmjet projektit ORA Digjitale të marrë pjesë në debatin me rininë.

Ndërsa në programin e saj Aleanca Kosova e Re (AKR), premton se do të krijoj kushte që aty ku banojnë qytetarët (fshat e qytet) të ndërtohen hapësira për objekte kulturore-sportive. Varësisht nga dendësia e banimit, AKR-ja do të hap salla të takimeve, salla për përdorim të multi-aktiviteteve.

Të gjitha këto parti thonë se do t’i realizojnë të gjitha këto premtime në të ardhmen, të bindura se do të dalin fituese nga zgjedhjet e 17 nëntorit. /teuta hykolli-gashi/

Partitë premtojnë se fusha e arsimit do të jetë prioritet kombëtar

Megjithëse arsimi kosovar është ballafaquar me probleme të shumta gjatë këtyre viteve të pasluftës, partitë më të mëdha politike në vend, në programet e tyre për zgjedhjet e 17 nëntorit, arsimin e kanë shndërruar në prioritet dhe shumica prej tyre thonë se arsimi shumë shpejt do të jetë i përafërt me vendet më të zhvilluara.

Vizioni i partisë në pushtet- Lidhjes Demokratike të Kosovës (LDK), është për një shoqëri të dijes, e integruar në rrjedhat evropiane me mundësi të barabarta për zhvillim personal të të gjithë individëve, të cilët kontribuojnë në zhvillim të qëndrueshëm ekonomik dhe shoqëror.

Ndërkaq misioni i tyre është “ndërtimi i një sistemi arsimor gjithëpërfshirës, që siguron kushte për formim cilësor të të gjithë individëve duke kultivuar shprehi të të nxënit gjatë gjithë jetës me vlera të qytetarisë demokratike”.

Programi i LDK–së për arsimin në Kosovë, sipas tyre, do të arrihet përmes ndërtimit të një sistemi arsimor që ofron mundësi të barabarta për të gjithë qytetarët e Kosovës, ofrimit të arsimit cilësor sipas standardeve evropiane, ndërtimit të një sistemi të arsimimit gjatë gjithë jetës, me qëllim të përtë¬ritjes së vazhdueshme të njohurive, integrimit në rrjedhat evropiane të arsimit– anëtarësimi në Procesin e Bolonjës, etj.

Ndërsa Partia Demokratike e Kosovës (PDK), do të angazhohet për modernizimin e sistemit të arsimit në Kosovë dhe nivelizimin e tij me standardet e shteteve të demokracive perëndimore.

Enver Hoxhaj, udhëheqës në Departamentin e arsimit në këtë parti, tha se një angazhim të veçantë e kanë në shtrirjen e arsimit fillor për të gjithë qytetarët e Kosovës.

“PDK do të ketë synim të saj të vazhdueshëm përmirësimin e kushteve të gjithanshme në të gjitha nivelet e arsimit, stimulimin adekuat në bazë të vlerave të punës dhe ngritjes profesionale të punëtorëve arsimorë”, theksoi ai, duke shtuar se PDK do të inkurajojë dhe mbështesë iniciativën për depolitizimin e sistemit arsimor dhe do të angazhohet për krijimin e kushteve për arsimim privat.

Ndërsa zyrtar të Aleancës për Ardhmërinë e Kosovës (AAK), thanë për KosovaLive se ende nuk e kanë përpiluar programin e plotë për fushën e arsimit pasi që, sipas tyre, një program i tillë do të publikohet gjatë kësaj jave.

Kurse Partia reformiste ORA, në programin e saj parazgjedhor posedon sloganin “Përgatitu për vendin tënd në Evropë”.

Parimet themelore të kësaj partie, në sferën e arsimit janë: përfshirjen e gjithë fëmijëve të Kosovës në arsimin e obliguar, zbatim të plotë të Ligjit për arsimin, vlerësimin dhe nivelizimin meritor të pagave të punëtorëve të arsimit, rritjen e përfshirjes së fëmijëve parashkollorë në institucionet arsimore, ndërsa kujdes i veçantë tu kushtohet fëmijëve dhe nxënësve me nevoja të veçanta nënshkrimin dhe implementimin e deklaratës së Bolonjës.

Programi i ORA-s parasheh reformim të sistemit arsimor dhe të planprogrameve si dhe harmonizimin e sistemit arsimor dhe të planprogrameve me ato të universiteteve evropiane si dhe njohjen e diplomave.

Ndërkaq koalicioni Lidhja Demokratike e Dardanisë (LDD) dhe Partia Shqiptare Demokristiane e Kosovës (PSHDK), në programin e tyre parazgjedhor parashohin që arsimi dhe shkenca të zënë një ndër vendet kryesore të projekteve të tyre.

Ata besojnë se investimi në zhvillimin e qëndrueshëm të arsimit dhe shkencës është imperativ i kohës.

Programi i LDD-së synon krijimin, rishqyrtimin dhe përfundimin e infrastrukturës ligjore të arsimit dhe shkencës në vend, pastaj ndërtimin e sistemit efektiv për zhvillimin e arsimit dhe shkencës, transformimin dhe reformimin e sistemit arsimor në të tria nivelet, themelimin e Fondacionit “Fehmi Agani”, për ngritjen e kuadrove deficitare, për specializime dhe studime postdiplomike (magjistraturë dhe doktoraturë), duke konsideruar prioritet investimin në ardhmërinë e Kosovës.

Kurse një ndër objektivat kryesore të Aleancës Kosova e Re (AKR) është largimi i universitetit nga kryeqyteti dhe ndërtimi i një objekti të ri ku një student do të ketë deri në 12 metra katrorë.

Sipas programit të tyre, do të fillohet rrënjësisht reformimi i sistemit arsimor, do të ndërtohen hapësira edukative-shkollore, që të nivelizohen me standarde të pranueshme evropiane.

Ndryshe, zgjedhësit kosovarë, pritet të kenë përpara vetes më 17 nëntor, 97 oferta për votim në nivelin lokal dhe qendror të qeverisjes, për mandatin e ardhshëm të institucioneve të Kosovës, ndërkohë që përveç entiteteve politike shqiptare, në garë do të jenë edhe përfaqësuesit e pakicave, përfshirë këtu edhe disa parti të serbëve. /flora loshi/

Shumica e partive synojnë shfrytëzimin racional të tokave bujqësore

Bujqësia konsiderohet si një nga potencialet dhe mundësitë e mëdha për zhvillimin e gjithmbarshëm të Kosovës, prandaj partitë konkurruese për zgjedhjet e 17 nëntorit, në programet e tyre zgjedhore, një vend të veçantë i kanë kushtuar zhvillimit të këtij sektorit dhe premtojnë që fshatrat kosovare do t’u ngjasojnë atyre evropiane, ndërsa thonë se fermerëve do t’ju përmirësohet gjendja qind për qind.

Lidhja Demokratike e Kosovës (LDK), e cila është duke qeverisur vendin qe tri vite në koalicion me Aleancën për Ardhmërinë e Kosovës (AAK), premton se do të vazhdojë angazhimin për sigurimin e kushteve të barabarta të jetës dhe punës ndërmjet rajoneve rurale dhe urbane.

Në bazë të politikave ekonomike, LDK do të ndikohet në shfrytëzimin racional të tokës, përmirësimin e kapaciteteve prodhuese, rritjen e përqendrimit të tokave bujqësore, sipas variacioneve kulturore dhe operacioneve bujqësore dhe nxitjen e kulturave fitimprurëse.

Gjithashtu, programi i LDK-së për zgjedhjet e 17 nëntorit, fokusohet në ngritjen e infrastrukturës në fshatra dhe zona rurale, duke siguruar furnizi¬min me ujë dhe energji elektrike si dhe asfaltimin e rrugëve rurale, pastaj zhvillimin e tregut të produkteve bujqësore, të tregut të tokës bujqësore, qen¬dra¬ve të grumbullimit të produkteve bujqësore dhe aplikimin e lehtë¬sirave fiskale dhe sezonale për prodhimtarinë bujqësore, etj.

Ndërkaq zyrtarët e partisë më të madhe opozitare, Partisë Demokratike të Kosovës (PDK) thanë për KosovaLive se programi i saj është duke u prezantuar pjesë- pjesë, kështu që nuk dhanë hollësi rreth asaj se si e parashohin zhvillimin e sektorit të bujqësisë dhe blegtorisë në Kosovë.

Ndërsa Aleanca për Ardhmërinë e Kosovës, e njeh dhe e pranon rolin e bujqësisë në ekonominë kosovare dhe premton se brenda një viti buxhetor pozita e bujqësisë dhe e fermerit kosovar në krahasim me gjendjen e sotme do të përmirësohet qind për qind.

Bujqësia, sipas programit zgjedhor të AAK-së, është një nga potencialet dhe mundësitë e mëdha për zhvillimin e gjithmbarshëm të Kosovës, prandaj AAK synon që të themelojë Drejtorinë Qendrore të Rezervave të Mallrave, Agjencinë për Zhvillim Rural, krijimi i infrastrukturës rurale, etj.

Gjithashtu, agjenda e AAK-së për sektorin e bujqësisë dhe zhvillimit rural për mandatin vijues është: reforma institucionale e institucioneve të cilat kanë mandatin dhe përgjegjësinë ligjore e kushtetuese të organizimit të zhvillimit të bujqësisë së Kosovës, pastaj rritja e buxhetit dedikuar bujqësisë, hartimi i politikave për mbështetje direkte të fermerëve dhe krijimi i fondit të subvencioneve, etj.

Ndërsa motoja e Partisë Reformiste ORA për bujqësi është “Jetë e denjë nga toka, jo vetëm mbijetesë”. Bujqësia është bazë e zhvillimit ekonomik të Kosovës, sipas ORA-s.

Ndërsa parimet themelore të angazhimit të kësaj partie në sferën e bujqësisë janë: ngritja e aftësisë konkurruese të prodhimeve vendore në mënyrë që prodhuesit kosovarë të konkurrojnë në mënyrë të barabartë me prodhuesit e vendeve të rajonit por edhe ata të BE-së, pastaj krijimin e shoqatave për bashkëpunim të bujqve, stimulimin e krijimit të lidhjeve kredituese në mes të përpunuesve (qumështoreve, mishtoreve, mullinjve, birrarive, fabrikave të vajit dhe prodhuesve), ruajtjen e sistemeve të ujitjes dhe tokave që gjinden nën ujitje, etj.

Gjithashtu sipas planit veprues, ORA synon që nëpërmjet bashkimit të mjeteve të Fondit zhvillimor të Kosovës, që do të përfaqësonte shtetin e Kosovës dhe të prodhuesve bujqësorë, të themelojë Bankën Agrare që do të kreditonte zhvillimin e bujqësisë dhe blegtorisë.

Ndërsa koalicioni Lidhja Demokratike e Dardanisë (LDD) dhe Partia Shqiptare Demokristiane e Kosovës (PSHDK), për bujqësinë dhe politikat agrare, synojnë që të krijojë një bujqësi të industrializuar dhe intensive.

LDD-PSHDK konsiderojnë se zhvillimi i sektorit agrar të vendit paraqet thelbin e ecjes drejt ekonomisë së tregut. Ata në programin e tyre zgjedhor premtojnë se do t’i shfrytëzojnë reformat në bujqësi dhe do të punojnë në zbatimin e politikave agrare që do t’i jepnin impulse të reja zhvillimit të bujqësisë.

Gjithashtu, ata premtojnë se do të angazhohen në nxitjen e zhvillimit të prodhimeve bujqësore që ato të bëhen konkurruese në tregjet vendore, rajonale dhe ndërkombëtare dhe për aplikimin e skemave kreditore, për krijimin e Fondit për Zhvillim Rural etj.

Ndërkaq Aleanca Kosova e Re (AKR), thotë se gjatë katër vjetëve të qeverisjes do t’i ringjallë vlerat e bujqësisë, blegtorisë dhe pylltarisë, do t’i hapë tri platforma agroekonomike, në kuadër të së cilës do të ketë shkollë të mesme profesionale, laboratorë dhe objekte përpunuese dhe prodhuese të prodhimeve bujqësore, si mish, djathëra, qumësht, pasta, prodhime të drithërave, materiale paketues, etj.

Këto qendra, sipas programit të AKR-së do të bashkëpunojnë me fshatarët dhe pronarët e tokave, si dhe fermerët. Gjithashtu AKR garanton se toka do të shfrytëzohet në mënyrë racionale, do ta riaktivizojmë ujitjen, garantojnë se Departamenti i Bujqësisë do të sigurojë që Kosova gjithmonë të ketë drithëra, bukë për popullatën e ushqime për shtazët, duke krijuar edhe rezerva shtetërore.

Ndryshe, zhvillimi i bujqësisë dhe blegtorisë në Kosovë është ndër prioritetet e të gjitha partive konkurruese në nivelin lokal dhe qendror të qeverisjes, për mandatin e ardhshëm të institucioneve të Kosovës. /flora loshi/

Partitë premtojnë strategji për forca mbrojtjeje e sigurie të standardeve të NATO-s

Të gjitha partitë politike shqiptare që garojnë për më shumë vende në Kuvendin e Kosovës, edhe kësaj herë në prioritetet e programit të tyre zgjedhor, kanë krijimin strukturave të mbrojtjes dhe sigurisë, të denja për integrim në NATO.

Në zinxhirin e sigurisë, partitë politike kanë krijimin e të gjitha hallkave që krijojnë siguri të plotë për të gjithë qytetarët. Këtu përfshihet, një ushtri moderne e trajnuar nga NATO, një shërbim inteligjent modern dhe një polici efikase dhe e fuqishme për të luftuar krimin e organizuar.

Lidhja Demokratike e Kosovës (LDK), në programin zgjedhor vlerëson se nuk ka mundësi të zhvillohen sektorët e tjerë të shoqërisë, ata ekonomikë e socialë, pa krijimin e parakushteve elementare të sigurisë së përgjithshme e individuale të qytetarëve të Kosovës dhe kontrollit civil mbi forcat e sigurisë.

Në vizion e saj, LDK-ja synon që me një strategji gjithëpërfshirëse të sigurisë, të krijojë institucionet dhe organet e mjaftueshme për të përmbushur nevojat elementare të qytetarëve për siguri, mbrojtjen e territorit dhe sovranitetit të Kosovës, ruajtjen e stabilitetit shoqëror, politik dhe eko¬nomik, e ligjit dhe rendit kushtetues.

Partia në pozitë, gjithashtu synon profesionalizim të mëtejmë të policisë së Kosovës, me ngritje të kapaciteteve dhe përmirësimin e kushteve dhe mjeteve të punës, për ballafaqim me terrorizimin dhe elementet terroriste, krimin e organizuar dhe atë ekonomik si dhe krijimin e organeve brenda policisë dhe në Ministrinë e Punëve të Brendshme për bashkëpunim me institucionet relevante ndërkombëtare në parandalimin e krimit të organizuar ndërkombëtar që përfshin edhe Kosovën.

LDK premton se do të përkrah krijimin e Forcës së Sigurisë së Kosovës, si institucion kryesor përgjegjës për veprim në rast të rrezikut për Kosovën nga faktorët e jashtëm apo të brendshëm.

“Institucionet e sistemit të sigurisë në Kosovë, të udhëhequra nga Ministria e Brendshme dhe ajo e Mbrojtjes, që do të krijohet, do të kryejnë jo vetëm detyra të mbrojtjes dhe parandalimit të rreziqeve por edhe mbledhjes së informatave, punëve analitike dhe planifikuese, që të gjitha me qëllim të ruajtjes së gatishmërisë vepruese”, thuhet në programin e LDK-së.

Në anën tjetër, Jakup Krasniqi, sekretar i përgjithshëm i Partisë Demokratike të Kosovës (PDK) tha për KosovaLive se në programin zgjedhor të tyre, lidhur me këtë çështje kanë paraparë të bëhet një formë mjaft e thellë në këtë fushë, një formë që do të shkon nga konsolidimi i institucioneve të cilat do të merren më sigurinë dhe fuqizimi i tyre për t’i kryer detyrat dhe përgjegjësitë ndaj qytetarit, në mënyrë që në Kosovë të sundoj rendi dhe ligji.

Ndërkaq, partia më e re në Kosovë në këto zgjedhje, Lidhja Demokratike e Dardanisë (LDD), premton se do të angazhohen për krijimin i Ministrisë së Mbrojtjes së Kosovës me kompetenca të plota.

“LDD në koalicion më Partinë Shqiptare Demokristiane të Kosovës (PSHDK) do të angazhohen që Kosova të ketë një mekanizëm të sigurisë, i përbërë nga tri shtylla kryesore: Ministria e Punëve të Brendshme, me kompetenca të plota dhe e reformuar konform standardeve ndërkombëtare dhe në pajtueshmëri me Misionin Planifikues të BE-së”, thuhet në programin e tyre.

Koalicioni LDD-PSHDK, do të angazhohet që TMK-ja të transformohet në Forcën e Sigurisë së Kosovës (FSK), e cila do të organizohet dhe përgatitet në përputhje me standardet më të larta të NATO-s.

Gjithashtu, ky koalicion do të angazhohet që Forca e Sigurisë së Kosovës të jetë partner strategjik i ushtrisë amerikane dhe NATO-s në operacionet paqësore dhe luftën kundër terrorizmit global.

Ndër të tjera, koalicioni LDD - PSHDK angazhohet për krijimin e Shërbimit të
Inteligjencës, i cili do të jetë profesional dhe jopartiak dhe për krijimin e një sistemi të
Shërbimit të Zjarrfikësve, modern dhe profesional

Ndërsa zyrtarë të Aleancës për Ardhmërinë e Kosovës (AAK), konsiderojnë se sa i përket sistemit të sigurisë në vend do të punojnë që institucionet kryesore të sigurisë të kenë një kontroll demokratik, të jenë transparentë dhe llogaridhënës.

Në programin e tyre zgjedhor AAK ka paraparë mbikëqyrjen e institucioneve të sigurisë prej presidentit dhe qeverisë, themelimi i këshillit kombëtarë të sigurisë, përkrahjen e plotë për SHPK-në, TMK-në e cila sipas tyre, duhet të jetë forcë e ardhme e vendit, njëkohësisht shërbimin inteligjent i cili duhet të ketë qasje proaktive për ta ndihmuar shtet formimin e Kosovës.

Ndërkaq, parimet e përgjithshme të angazhimit të Partisë Reformiste “Ora” në sferën e sigurisë janë Kosova të ketë një force profesionale të sigurisë, kompatibile me nevojat e Kosovës

Gjithashtu ata do të angazhohen që Kosova të ketë forcën e sigurisë të profilizuar sipas modelit të aleancës veri-atlantike, partneritet afatgjatë në integrimet Euro-Atlantike, forcat e sigurisë të Kosovës të profilizohen sipas një domeni të veçantë në kuadër të NATO-s, themelimin e një njësiti të xhandarmërisë si njësi mbështetëse për forcat e rendit në luftën kundër krimit të organizuar dhe kërcënimet tjera të sigurisë.

“Integrimi i të gjitha strukturave të tashme të sigurisë, vënia e Shërbimit Policor të Kosovës nën Ministrinë e Brendshme të Kosovës dhe themelimi i komponentëve tjerë të sigurisë të të gjitha njësitë hetuese dhe të informimit e zbulimit janë kushte që Kosova të ketë infrastrukturë të nevojshme për të garantuar sigurinë e qytetarëve në tërë territorin e Kosovës”, thuhet në programin zgjedhor të kësaj partie.

Gjithashtu edhe Aleanca Kosovare e re (AKR), premton se do të krijojë Departamentin e sigurisë dhe mbrojtjes dhe premton se do të marrin hapa konkretë për të parandaluar veprimet destabilizuese e kërcënuese, veprimet terroriste.

Në programin e tyre zgjedhor përfaqësuesit e AKR-së, kanë premtuar një Kosovë të sigurt për secilin qytetar.

Të gjitha këto premtime të disa partive politike i kanë të paraqitura në programet e tyre zgjedhore, që konkurrojnë në zgjedhjet e 17 nëntorit, e që janë të bindura se do të qeverisin me vendin./luljeta krasniqi/

Ekspertët thonë se institucionet e ardhshme duhet t’i japin më shumë rëndësi standardeve integruese

Koalicioni për Integrime Euro Atlantike “Forumi 2015”, nëpërmjet një raporti që publikoi këtë javë, i rekomandon institucioneve që do të dalin pas zgjedhjeve të 17 nëntorit, që të jenë më të përkushtuara dhe më efikase ndaj reformave demokratike në shoqërinë kosovare.

Këto rekomandime të “Forumit 2015”, vinë në periudhën kur subjektet politike me intensitet të shtuar iu kanë përveshur fushatës elektorale, për të zënë më shumë vende në institucionet e ardhshme të Kosovës.

Ekspertë të sektorëve të ndryshëm zhvillimor, të cilët kanë punuar në përpilimin e këtij dokumenti i rekomandojnë qeverisë së ardhshme të Kosovës, të ndërtojë një lidhje të fuqishme në mes të nivelit politik dhe vendimmarrës dhe nivelit administrativ, operacional dhe teknik, në mënyrë që të sigurohet zbatimi i politikave.

Venera Hajrullahu dhe Fatmir Curri nga Fondacioni i Kosovës për Shoqëri Civile konsiderojnë se lidhja në mes dokumenteve kryesore strategjike është e një rëndësie kruciale dhe për këtë arsye, finalizimi i Strategjisë dhe Planit Zhvillimor të Kosovës është nevojë urgjente. Përndryshe, sipas tyre, kjo paraqet pengesë në programin e asistencës financiare të BE-së.

Ndër të tjera, Hajrullahu dhe Curri konsiderojnë se Agjencia për Integrime Evropiane duhet të avancohet në Ministri për Integrime Evropiane. Ndërkaq, kjo e fundit duhet të bëhet pika qendrore e informimit dhe komunikimit me shërbimet e Brukselit.

Në anën tjetër, ekspertë të energjetikës, të cilët kanë punuar në përpilimin e këtij dokumenti, të titulluar “Platforma civile për zgjedhjet 2007”, rekomandojnë që të zvogëlohen humbjet teknike, deri në shkallën që teknikisht është e mundshme në kuadër të sistemit ekzistues të bartjes dhe distribucionit të energjisë elektrike.

Po ashtu, ata vlerësojnë se duhet të zvogëlohen në mënyrë efektive humbjet komerciale aktuale, ndërmjet ndjekjes penale të shfrytëzuesit ilegal të energjisë elektrike dhe inkasimit efikas të mjeteve financiare nga fatura mbi energjinë e konsumuar elektrike.

Nëpërmjet këtij dokumenti ekspertë të energjetikës i rekomandojnë qeverisë së ardhshme të vendosin sistemin e llogaridhënies për dështimet në kryerjen e punëve në tërë korporatën e KEK-ut, deri në ndërmarrje të shkëputjes së marrëdhënieve të punës.

Ndër të tjera, ata kërkojnë që qeveria e ardhshme të lufton korrupsionin e tanishëm të ndërtimit të termocentraleve, me vizion që të mos insistohet me kokëfortësi në ndërtimin e Termocentralit C-2100MË, me çdo kusht dhe me këtë cilësi.

Në anën tjetër, Ilir Begoll, nga Instituti Kombëtar për Shëndetësi Publike, më anë të këtij dokumenti i rekomandon qeverisë së ardhshme të Kosovës themelimin e sigurimeve shëndetësore, zvogëlimin për 30 për qind të sëmundjeve ngjitëse të cilat janë shkaktar nga shkaqet që mund të parandalohen për një periudhë.

Po ashtu, si ekspert i shëndetësisë, Begolli rekomandon zvogëlimin për 30 për qind të shprehive negative të konsumimit të duhanit, alkoolit dhe narkotikëve , ngritjen e shakullis së përgjegjësive dhe llogaridhënies në nivelet e qeverisjes dhe institucioneve shëndetësore.

Rekomandime janë dhënë edhe në sektorë të ndryshëm të rëndësishëm në shoqërinë kosovare./luljeta krasniqi/

Partitë politike premtojnë ngritjen e përfaqësive diplomatike

Përkundur nevojës së prezantimit të Kosovës në arenën ndërkombëtare, përfaqësitë diplomatike deri më tani kanë munguar, ndërsa në kuadër të programeve zgjedhore për zgjedhjet e 17 nëntorit, partitë politike në vend vlerësojnë se gjatë mandatit të ardhshëm do të angazhohen në ndërtimin e shërbimit diplomatik, ngritjen e ambasadave dhe të njësive konsullore të Kosovës.

Programet e tyre zgjedhore theksojnë angazhimin për një diplomaci aktive e cila synon avancimin e paqes, stabilitetit dhe bashkëpunimit ndërkombëtar.

Programi zgjedhor i Lidhjes Demokratike të Kosovës (LDK), thekson se LDK-ja, gjatë periudhës së ardhshme katërvjeçare si objektiv do të ketë: sigurimin e njohjes ndërkombëtare të Kosovës si shtet të pavarur dhe sovran, themelimin dhe funksionalizimin e plotë të Ministrisë së Punëve të Jashtme dhe ndërtimin e Shërbimit Diplomatik të Kosovës.

Procesi i themelimit të ambasadave të Kosovës do të fillojë me hapjen e tyre në Shtetet e Bashkuara të Amerikës, në Britani të Madhe, Francë, Gjermani dhe në Itali. Pastaj sipas programit zgjedhor të LDK-së, vjen vendosja e misioneve të përhershme të Kosovës në organizatat kryesore ndërkombëtare: OKB, BE dhe NATO në Bruksel dhe OSBE në Vjenë.

Në periudhën e parë të ekzistimit të shtetit të pavarur dhe sovran të Kosovës, prioritet i veçantë thuhet se do t’i jepet avancimit të procedurave për anëtarësimin e plotë të Kosovës në Bashkimin Evropian, në NATO, pastaj në Bankën Botërore, Këshillin e Evropës, Fondi Monetar ndërsa si një sprovë të veçantë për shtetin e ri të Kosovës vlerësohet të jetë anëtarësimi në OKB.

Hajredin Kuçi, nga Partia Demokratike e Kosovës (PDK) tha se projekti i PDK-së parasheh edhe ndërtimin e politikës së jashtme, respektivisht të Ministrisë së Punëve të Jashtme dhe ndërtimin e stafit të plotë diplomatik i cila përfshin vendosjen e ambasadave, fillimisht në kryeqytetet kryesore të botës dhe në ato vende ku ka numër të madh të banorëve të Kosovës.

Ai tha për KosovaLive se emërimi i ambasadorëve dhe stafit tjetër duhet të jetë mbi bazën e kritereve profesionale që duhet të jepen nga qeveria dhe me miratimin e kryetarit të Kosovës dhe në këtë drejtim, sipas tij, duhet të ndahet buxhet i veçantë për krijimin e Ministrisë së Punëve të Jashtme që do t’i ngjante vendeve të perëndimit.

“Në ditën e parë të krijimit të shtetit, PDK-ja vlerëson se duhet të vendosen 14 ambasada, si në Uashington, Nju Jork, Bruksel dhe në qendrat tjera me ndikim në Evropë dhe në rajon në të cilat kemi bashkëpunim të ngushtë politik, ekonomik”, tha Kuçi.

Sipas tij, në raport me institucionet ndërkombëtare, PDK-ja parasheh që në kohën e pavarësimit brenda gjashtë muajsh, shteti i Kosovës të jetë anëtar i Bankës Botërore, Fondit Monetar Ndërkombëtarë dhe institucioneve tjera dhe po ashtu ka theksuar se duhet bërë kërkesë që në fillim për anëtarësim në BE.

Edhe zëdhënësi i Aleancës për Ardhmërinë e Kosovës(AAK), Besnik Tahiri tha për KosovaLive se në kuadër të punës së gjertanishme do të vazhdojë zbatimi i legjislacionit në fuqi dhe pastaj do të vazhdojë me themelimin e Ministrisë së Punëve të Jashtme dhe me themelimin e ambasadave në 15 vende si në shtetet e Grupit të Kontaktit, pa Rusinë, në shtetet kryesore të Bashkimit Evropian, në Turqi dhe Shqipëri.

Ai tha se fillimisht do të punohet në funksionalizimin e Ministrisë së Punëve të Jashtme, pastaj të bëhet hapja e përfaqësive diplomatike dhe të punohet në aderimin e Kosovës në institucione të ndryshme ndërkombëtare.

Sipas tij, kjo politikë në vazhdimësi synon që të prezantojë Kosovën në mënyrën më të denjë, jo vetëm në aspektin politik por edhe në atë ekonomik për të lehtësuar zhvillimet kapitale që vijnë nga bashkësia ndërkombëtare.

Ndërsa në kuadër të planit të veprimit të Partisë Reformiste ORA në sferën e politikës së jashtme dhe diplomacisë, thuhet se qëllimi kryesor i politikës së jashtme të Kosovës do të jetë sigurimi i njohjes ndërkombëtare të pavarësisë së vendit si dhe vendosja dhe ruajtja e marrëdhënieve të mira me bashkësinë ndërkombëtare.

Vizioni i Partisë Reformiste ORA, thuhet të jetë për një diplomaci aktive e cila synon avancimin e paqes, stabilitetit, bashkëpunimit ndërkombëtar dhe zhvillimit të qëndrueshëm, qoftë përmes nismave rajonale, qoftë përmes atyre globale si OKB, NATO, e BE si dhe do të angazhohet për garantimin e të drejtave të qytetarëve të Luginës së Preshevës.

Partia Reformiste ORA, thuhet të angazhohet për një diplomaci që do të mbrojë interesat e shtetit dhe shtetasve të vet, kultivimin e partneriteteve strategjike, Kosova të jetë faktor stabiliteti në rajonin e Ballkanit dhe në Evropë, dhe për një diplomaci të ndërtuar mbi parimet “diplomacia është mbrojtje e shtetit” dhe “detyra e saj është t’i shndërrojë armiqtë në miq”.

Po ashtu, programi i tyre thekson ofrimin e shërbimeve dhe lehtësive për diasporën kosovare dhe anëtarësim të Kosovës në institucionet ndërkombëtare më të rëndësishme dhe më me interes për Kosovën.

Edhe programi zgjedhor i Lidhjes Demokratike të Dardanisë (LDD)-ja, në fushën e integrimeve euroatlantike dhe politikës së jashtme orientohet në

anëtarësimin sa më të shpejtë të Kosovës në Bashkimin Evropian, NATO dhe fuqizimin e miqësisë me SHBA.

Po ashtu thuhet se LDD-PSHDK siguron që misionet diplomatike të vendit do të jenë profesionale dhe të përgatitura mirë.

Në programin e tyre zgjedhor potencohet se koalicioni LDD-PSHDK do t’i përfundojë me sukses negociatat për Marrëveshjen e Stabilizimit dhe Asociim dhe se ky koalicion në periudhë afatmesme planifikon marrjen e statusit të kandidatit dhe anëtarësimin e plotë në BE.

Partia Aleanca Kosova e Re, e cila merr pjesë për herë të parë në zgjedhje në programin e tyre zgjedhor theksojnë se angazhohen për një Kosovë me përfaqësi diplomatike në vendet mike edhe në vendet ku ka shqiptarë dhe ku ka interesa biznesi si në Uashington, Bruksel e Bernë.

Po ashtu pohojnë se do të angazhohen për Kosovën të inkuadruar në NATO, BE, Grupin e Shangait e cila do të ketë marrëdhënie të mira me fqinjët, rajonin dhe me të gjitha shtetet me interes për Kosovën. Në programin e tyre zgjedhor thuhet se do të angazhohen edhe për atë që Kosova të ketë marrëdhënie speciale me Shqipërinë dhe Serbinë. /besnike salihu/